DILI: Xefe Estadu Maiór Jenerál FALINTIL-Forsa Defeza Timor Leste (F-FDTL), Lere Anan Timor hateten, veteranu FALINTIL sira ne’ebé ohin loron sei ativu iha F-FDTL laran la kontente ho moris ne’e, tanba laiha justisa kona-ba sira-nia estatutu no direitu ne’ebé sira hetan.
Veteranu FALINTIL sira ne’ebé uluk funu tinan 24 nia-laran ba TL nia independénsia nasionál, sira-nia estatutu no tratamentu hanesan funsionáriu públiku baibain de’it, no situasaun sai aat liu bainhira sira ba reforma, tanba ema la tau matan ba sira.
Forsa armada loloos iha estatutu espesiál ida ho nia natureza militár ketak no labele kompara.
Ko’alia kona-ba osan operasionál ka perdiem, funsionáriu públiku sira hetan US$ 40, maibé soldadu F-FDTL sira hetan de’it US$ 10 de’it. Ne’e laiha ekilíbriu.
“Veteranu sira ne’ebé to’o ohin loron sei servisu iha instituisaun F-FDTL, ita konta loloos sira halo ona tinan 44 serbí Estadu. Tinan 24 iha funu rezisténsia nia-laran no tinan 20 iha tempu independénsia nian. Ita haluha sira-nia esforsu no sakrifísiu harii nasaun no Estadu Demokrátiku ne’e,” dehan Lere, iha Kuartél Jerál F-FDTL, Fatuhada, horisehik.
Nia hatutan, dala balu ho impase polítiku ne’e, liuliu na’i ulun sira taka matan ba problema sira ne’e. Nasaun ne’e estavel tanba kontribuisaun boot husi lider istóriku sira hamutuk ho veteranu FALINTIL sira.
Ohin loron ema balu hakarak hamoos istória no inventa istória. Sira dehan ukun-aan ne’e hahú husi (pregu) konsulta populár, no sira nega prosesu tomak ne’ebé la’o molok konsulta populár, FRETILIN no FALINTIL ne’e patrimóniu Estadu nian ne’ebé labele husik malu.
Nia subliña, ohin loron FRETILIN partidu polítiku ida, maibé FRETILIN uluk nia mak mata-dalan no komanda FALINTIL hodi funu no reziste hasoru invazór sira ba libertasaun nasionál, sobrevivente sira ne’ebé uluk komanda funu mak Kay Rala Xanana Gusmão, Mauhunu Bulerek Karatayanu.
“FRETELIN no FALINTIL mak laiha karik referendu mós laiha no Independénsia laiha. Ita tenke rekoñese katak uluk FRETILIN mak mata-dalan no FALINTIL mak liman kro’at FRETILIN no Povu Maubere nian. Ikus mai CNRT moris nu’udar produtu unidade nasionál no despartidarizasaun FALINTIL nian no lori timoroan sira ba referendu,” dehan nia.
Estadu deside ona harii instituisaun rua hanesan Konsellu Veteranu no Ministériu Veteranu, instituisaun rua ne’e Estadu fó responsabilidade atu identifika problema sira hotu ne’ebé ohin temi ona no fó solusaun.
Tenke buka mós dalan oinsá atu ema labele nega no labele hamoos istória. Dalan di’ak liu mak habelar istória ba jerasaun foun sira liuhusi dalan edukasaun sívika, hahú husi eskola sira, partidu polítiku, instituisaun Estadu no seluk tan, atu sidadaun hotu-hotu bele hatene istória ne’e nu’udar TL nia identidade rasik.
“Ami fó rekomendasaun ba Estadu no Governu, atu loron 20 Agostu sai loron nasionál, atu Estadu no Governu halo lei hodi garante veteranu sira-nia futuru, no sira-nia oan, bei-oan bele hetan direitu, tanba aman-inan sira nia kontribuisaun boot ba libertasaun nasionál. Tinan-tinan iha Orsamentu Jerál Estadu (OJE) iha nafatin fundu atu harii veteranu sira-nia uma ka hela fatin ne’ebé dignu,” dehan nia.
