Rosaria Aparicio husi Munisipiu Baucau hatete, kliente Western Union   sira preokupa ho sistema atendementu iha prosesu foti osan, tanba dala ruma kliente balun hein to’o semana ida hafoin bele foti sira nia osan.

Aliende ne’e, kliente sira ne’ebé atu mai foti osan obrigasaun tenke hamrik de’it iha loron manas nia laran no dudu malu, tanba laiha kondisaun ne’e duni kliente sira husu atu hadia sistema hirak ne’e.

“Ita mai ho labarik sira, maibé hamrik sena malu iha loron manas nia laran. Prosesu atendementu ladun di’ak, tanba funsionariu sira ne’ebé halo atendementu ema na’in 3 no dala ruma sira dehan osan seidauk tama, entau ami pasensia hodi hein, depois dehan fali hein ami telefone, maibé nunka telefone,” informa Rosaria Aparicio iha Western Union, Kolmera, foin lalais.

Iha fatin hanesan, kliente Madalena dos Santos husi Munisipiu Emera hatete, nia parte la kontenti ho prosesu atendementu iha Western Union, tanba prosesu foti osan ne’e kleur liu.

 “Ami mai husi rai dook atu foti osan, maibé to’o iha ne’e dehan osan seidauk tama no dehan ami hein sira telefone, maibé realidade nunka telefone,” tenik Madalena.

Too notisia ne'e publika, seidauk hetan klaifikasaun husi parte Western Union.