Sa tan, tuir Lere, portavoz RNDJ-KRDTL Angela Freitas mak ‘lasu’ Maijor Alfredo Reinado no Mauk Moruk to’o sira na’in rua mate.

“Ha’u rona Angela dehan atu hatun prezidente iha loron 4 Setembru 2020. Ha’u husu ba Angela ‘o maka hatun prezidente ou haruka tali mak sa’e fali o’. Loloos ne’e ita-nia governu la pudia simu ona ema ida hanesan Angela Freitas  iha Timor, biar nia Timor-oan. Tanba krize 2006 nia halo Majór Alfredo Reinado mate, Mauk Moruk mate tan,” dehan Lere ba jornalista sira iha Kuartel Jeneral F-FDTL, Fatuhada, Dili, Segunda (31/08).

Lere dehan, nia sei la husik kualker ema atu hatuun nia maun sira ne’ebé uluk komanda funu.

“Ha’u la husik kualker ema hatun ha’u-nia maun sira ne’ebé uluk komanda funu, hahú husi Maun Xanana, Tuar no Lú Olo, Mari Alkatiri no Ramos Horta,” dehan Lere.

Maske rekoñese katak kada sidadaun iha direitu atu halo asaun, maibé nia sei la tolera asaun ne’ebé RNDJ-KRDTL organiza bainhira mosu asaun krime ruma.

“Ha’u sei haruka futu, kesi Angela, sira ne’e hotu, Aitahan Matak sama belar hotu. Ha’u hanoin bele hatun joven sira Aniceto (Guterres), ka hatun ministru foun sira ne’e bele hatun. Mais ha’u dehan katuas sira ne’e, sira hatun husi demostrasaun, ha’u haruka (forsa) sama sira, i ha’u responsabiliza, ba hatan iha tribunál, iha direitu umanu,” Lere ameasa.

Tuir Lere, estadu RDTL ne’e harii ho ema barak nia mate no sofrimentu. Tanba ne’e nia sei la permite kulkér grupu atu sobu unidade lider nasionál sira no sobu nasaun RDTL.

“Uma (RDTL) ami mak harii, agora ó hakarak duni ami sai husi uma laran. Ó la’ós uma-nain tan. Posa ha’u nia feton, ha’u-nia doben ne’e dala-ruma hanoin ladun loos ona karik.”

Lere hatete, atu hatuun ema husi kargu PR tenke kumpre regras demokrasia, liu husi eleisaun no povu mak determina nia votu, la’os tuir ema ida ka rua nia hakarak.

"O (Angela) dehan ema iha atau troka nia (PR Lú Olo), kuitadu, regras loloos ne'e kuandu nia (PR) moras ou mate, Prezidente Parlamentu ma sa’e,” dehan nia.

Angela Mantein

Iha fatin ketak, Portavoz RNDJ-KRDTL Angela Freitas hatete, RNDJ-KRDTL ho Polisia Nasional Timor-Leste (PNTL) konkorda ona atu iha 4 Setembru 2020, massa sei halibur hamutuk iha Tasi Tolu hodi halo asaun kontra PR Lú Olo.

“Ita iha serteza ona katak iha Sesta-feira, 4 Setembru 2020, sei halibur massa popular husi munisipiu 12 inklui RAEOA iha Tasi Tolu no polisia sei fó seguransa,” dehan Angela ba jornalista sira hafoin hasoru-malu ho parte PNTL iha Kuartel Jeral PNTL, Kaikoli, Segunda (31/08).

Angela dehan, massa ne’ebé sei tuun hodi kontra PR Lú Olo mai husi veteranus, sosidade sivil, partidu politiku, akademiku no komunidade baibain.

“Ema ne’ebé atu tuir mainifestasun mai husi komponente hotu-hotu hanesan veteranus, sosidade sivil, partidu politiku, akademiku no komunidade, tanba ne’e ami prepara ona lojistika atu fasilita massa husi munisipiu sira atu mai tuir manifestasaun,”  dehan nia.

Iha fatin hanesan, portavoz Komandu Jeral PNTL Superintendente Xefe Arnaldo Araujo hatete, ekipa grupu RNDJ-KRDTL ne’ebé lidera husi Angela Freitas hasoru Komando Jeral PNTL hodi koalia kona-ba asaun pasifiku kontra PR Lú Olo iha 4 Setembru.

“Ohin ami enkontru iha ona konkordansia ba malu kona-ba fatin, sei halo mainfestasaun iha Tasi Tolu atu PNTL bele asegura seguransa ho di’ak, tanba iha loron 4 Setembru 2020 ba leten atividade barak mak sei realiza,” dehan nia.

Tuir nia, grupu RNDJ-KRDTL priense ona rekejitus, no asaun ne’e rasik sei hala’o hahú husi 4 to’o 18 Setembru.

“Manifestasaun sei hahú iha 4 to’o 18 Setembru 2020, maibé sira sei ba hadia karta koñesimentu, tanba iha karta hakerek fatin konsentrasaun massa popular iha Tasi Tolu, Bekussi, no Bairo Formoza, maibé ami konkorda ona katak, sei konsentra de’it iha area Tasi Tolu atu ami bele fó seguransa ba sira ho di’ak,” dehan nia.