Porta Vós OXFAM iha TL, Adilson da Costa Junior hateten, objestivu husi media tour ne’e mak atu fasilita jornalista sira hodi halo kobertura konaba asuntu mudansa klimátika iha Timor-Leste ho nia efeitu ba komunidade sira iha área rural.
Nia dehan, mudansa klimatika ne’e liga ba feto no labarik ho ema ho difisiente sira dala barak sai vulneravel liu, bainhira akontese mudansa klimatika iha Timor-leste.
Tanba ne’e programa media tour hanaran ativismu ambiental ho nia objetivu atu aumenta jornalista sira nia kuiñesimentu no membru organizasaun sosiadade sivil inklui joven dizital sira, esplora no buka hatene informasaun sira iha área rural, liliu ba área sira ne’ebé sai alvu ba media tour ida ne’e.
“Media tour ne’e ami realiza, servisu hamutuk ho AJTL fasilita jornalista sira ba munisipiu Ermera ho Rejiaun Administrativu Espesial Oecussi Ambenu (RAEOA) atu halo kobertura durante loron 4 hodi identifika problema saida mak komunidade sira iha área rural hasoru,” dehan nia iha komferensia Imprensa iha edifisu OXFAM Hudi, Laran, segunda ne’e (20/02).
Nia afirma, durante loron 4 nia laran jornalista sira sei halo kobetura iha área rural, hodi rekolla informasaun husi komunidade sira liliu atu esplora liu tan matenek lokal sira ne’ebé durante ne’e komunidade sira uza hodi rejilente hasoru problema mudansa kliamatika.
Nia haktuir, durante ne’e komunidade sira rasik uza sira nia matenek lokal hodi envolve joven feto, labarik no ema ho difisiensia hamutuk ho organizasaun komunidade iha área rura hodi konserva bee uza ba nesesidade moris.
OXFAM ho AJTL molok realiza media tour dahuluk, kria uluk diskusaun ho sosiadade sivil no governu sira konaba problema ne’e komunidade sira hasoru iha área rural inklui programa sira ne’ebé governu implementa iha baze konaba asuntu mudansa klimatika nian.
“Informasaun sira ne’e, ami hanoin bele apoiu jornalista sira durante loron 4 nia laran bele hetan informasaun husi komunidade sira iha área rural atu sai referensia ba governu ho ajensia, bainhira implementa programa tenke halo adaptasuan ho mudansa klimatika iha TL,” dehan nia.
Entretantu, Presidente AJTL, Zevonia Vieira informa, media tour ne’e atu fasilita jonalista sira hala’o sira nia atividade atu identika probema iha área rural, liliu konaba asuntu feto no labarik vulneravel no ema ho difisiente sira ne’ebé hetan impaktu husi mudansa klimatika iha TL.
“Media tour ne’e espera bele fó espasu ba ema lian laek sira, atu hato’o sira nia preokupasaun ba estadu atu buka solusaun ida ne’ebe diak, bainhira ita iha situasaun hasoru mudansa klimatika global liliu iha Timor-Leste,” dehan nia.
Enkuantu, media tour ne’ebé AJTL ho OXFAM realiza, ida ne’e ba dala tolu ona, hodi identifika isu sosial sira ne’ebe liga ho justisa ba mudansa klimatika, ekonomia, bee moos no jeneru ne’ebé importante iha TL.
Ho nune’e, media tour ne’e importante ba OXFAM ho AJTL atu tulun governu ho Parlamentu Nasional bainhira debate OJE kada tinan bele tau mós prioridade ba kestaun sosial ne’ebe komunidade hasoru iha baze.
“Agora ita hotu hatene tama ona iha tinan politika, partidu sira komesa prepara sira nia ajenda programa atu husu povu nia votu atu kaer ukun ho ida ne’e media mós iha papel importante atu rekolla isu sosial ne’ebe feto no labarik, no mós ema ho difisiente sira hasoru, nune’e bainhira Partidu sira manan iha elisaun bele tau importansia,” afirma nia.
Media tour ne’e sei akumula Jornalista na’in 13 husi media Rttl, Jornal INDEPENDENTE, Dili Post, Timor-Post, Online Loluwari, Neonmetin, no Radiu Komunidade Maubesi ho Rakambia desloka ba Munisipiu Emera ho RAEOA atu halo kobertura ba asuntu refere durante loron haat nia laran.
