“Orsamentu ne’e sei uza hodi finansia Projetu Fortalesimentu Preparasaun no Resposta ba Moras Infesioza sira iha Timor-Leste,”dehan nia iha komunikadu ne’ebé Online INDEPENDENTE sita, segunda (20/02).

Tuir akordu ne’ebé Ministru Rui Gomes sei asina iha tempu badak nia laran, KOICA kompromete atu fórnese kontribuisaun finanseira ne’ebé sei uza atu hametin preparasaun no resposta ba moras infesioza (moras ne’ebé hadaet lalais) sira iha Timor-Leste, liuhusi reforsu kapasidade atu deteta, notifika no hatán iha nível hotu-hotu, tuir tempu ne’ebé loloos ba eventu no surtu sira moras infesioza prioritária sira nian, nune’e mós liuhusi preparasaun husi espesialista nasionál sira ba iha área ida-ne’e.

Tuir komikadu, husi Novembru 2020 to’o Fevereiru 2023, oitavu Governu Konstitusionál mobiliza ona subvensaun públiku (Grant) ho totál $623,8 milhões.

Husi montante ne’e, KOICA kontribui ona $25 milhões ne’ebé kompostu husi $5 milhões ba Projetu Dijitalizasaun Chega; $7,8 milhões ba Projetu “Say No To 5S”, $6,2 milhões ba Projetu “YEES” no adisionál $6 milhões ba Projetu Fortalesimentu Preparasaun no Resposta ba Moras Infesioza sira iha Timor-Leste.

Entretantu, kontribuisaun finanseira adisionál $6 milhões ne’e nu’udar provas konfiansa husi Parseirus Dezenvolvimentu mai Oitavu Governu Konstitusionál lideradu husi Primeiru-Ministru, Jenerál Taur Matan Ruak.

Enkuantu, orsamentu ho totál $623,8 milhões (inklui ona $420 milhões husi MCC), Governu uza hodi finansia investimentu estratéjiku hanesan konektividade transporte (Estradas, Pontes no Aeroportu), investe iha kapitál umanu hodi mellora produtividade laborál (Saúde, Edukasaun, Protesaun Sosiál, Bee Mo’os no Saneamentu, Abilidade Empregu no Empreendedorismu ba Foin-sa’e sira) inklui Enerjia Eletrisidade.