Objetu mai iha PN, tuir Oscar Lima, atu hato’o emprezariu Timor oan sira nia preokupasaun nomós komprimenta Deputadu Aniceto Guterres ne’ebé hetan fiar sai Prezidente Parlamentu Nasionál.

“Ami mai ko’alia problema ne’ebé emprezáriu Timor oan sira hasoru, nune’e bele buka nia solusaun. Prinsipalmente ko’alia mós konaba ba lei no dekretu-lei balu ne’ebé soke malu hela, liu-liu kona ba pra-kualifikasaun, tanba ida ne’e dekretu lei iha tiha ona, maibé la konsege implementa,” dehan Oscar Lima iha Parlamentu Nasionál, (22/07).

Nia haktuir, preokupasaun ida tán mak Lei Aprovizionamentu nian ho pra-kualifikasau ne’e la haan malu, tanba orsamentu ho montante millaun U$ 1.1 ba leten fó ba empreza internasionál.

Nune’e mós iha pra-kualifikasaun orsamentu millaun U$ 7 ba kraik ne’e ba empreza nasionál, ida ne’e sai preokupasaun boot, tanba ne’e mak CCI-TL hanoin tenke rezolve problema ida ne’e, sé la’e bele prejudika emprezáriu Timor oan sira.

Iha fatin hanesan, Prezidente Parlamentu Nasionál, Aniceto Guterres hatete, vizita husi Prezidente CCI-TL ho nia ekipa, ko’alia kona-ba dezenvolvimentu ekonómiku iha rai laran, tanba setór privadu nu’udar elementu ka xave ba dinamiza ekonomia país nian.

“Preokupasaun barak mak ohin sira hato’o, tanba Parlamentu Nasional hanesan órgaun ne’ebé halo desizaun politika, órgaun ne’ebé halo funsaun fiskalizasaun no lejizlasaun, ne’e duni Parlamentu Nasional sei hala’o intervensaun, oinsá atu hametin setór privadu sira,” dehan Aniceto.

Nia rekoñese entre lei ida ba lei seluk la haan malu no karik presiza armoniza, nune’e bele kompleta hirak ne’ebé seidauk iha, ne’e duni Parlamentu sei halo kompleta kuadru legál hodi fó fatin ba setór privadu.

Nia hatutan, lei pra-kualifikasaun no lei aprovijionamentu presiza armoniza, tanba la haan-malu, nune’e setór privadu bele partisipa no kontribui efetivamente.