“Ami husu, tanba governu fó ami-nia knaar liuhusi rezolusaun númeru 17/2012 iha ona, maibé ami husu hasa’e rezolusaun ne’e ba lei ka dekretu-lei,” dehan Prezidente CCI-TL, Óscar Lima, iha Parlamentu Nasionál, horisehik.

Óscar Lima dehan, rezolusaun ne’e kona-ba knaar CCI-TL nian, tanba Kámara Komérsiu no Indústria iha rai hotu-hotu ne’e iha lei, maibé Timor-Leste maka sei la'o ho rezolusaun.

Ne’e duni, CCI-TL tenke hala’o knaar ho lei ka dekretu-lei, tanba iha rai barak kámara komérsiu indústria moris ho lei la'ós ho rezolusaun governu.

“Ami haruka ona advogadu no la kleur ami mai aprezenta iha ne’e, nune’e parlamentu bele halo aprovasaun hodi sai lei, lalika sai rezolusaun,” dehan nia.

Iha fatin hanesan, Prezidente Parlamentu Nasionál, Aniceto Guterres hateten, Kámara Komérsiu Indústria iha Indonézia nian iha lei, tanba ne’e CCI-TL tenke iha instrumentu legál hodi atribui papél ba setór privadu timoroan sira.

“Kona-ba rezolusaun ne’e hasa’e ba lei ka dekretu-lei depende ba matéria ne’e tama eskluziva governu nian, entaun governu sei trata, se matéria ne’e tama mai parlamentu ami sei haree didi’ak no sei trata ho lei,”dehan nia.