“Médiku sira balun hetan ona maibé balun loron sanulu-resin no balun hetan loron tolu (30),” dehan nia, iha Parlamentu Nasionál, horisehik.

Ricardo dehan, problema mak ne’e ema sira ne’e servisu iha liña frente, se karik loron ida nia tama ne’e nia tama ona liña frente, la'ós atu hasai fali loron balun. Maibé governu la kategoria ba ida ne’e sai problema ba sira.

Tanba médiku sira hasoru situasaun ne’ebé perigu ba sira-nia vida durante períodu pandemia Coronavirus Disease 2019 (Covid-19).

“Ezemplu, hanesan nasaun sira seluk sira balun mate, oinsá ita atu kolia ba sira, maibé Grasa de Deus ita moras ne’e la rezulta ema balun mate no pesoál médiku sira mós la hetan moras ne’e,” nia hatete.

Nia sujere ministériu saúde atu haree problema médiku sira nian ne’ebé to’o agora balun seidauk hetan nia direitu subsídiu front line nian.

“Ita aprova ona orsamentu hodi haree ida ne’e, maibé to’o agora ministériu saúde seidauk rezolve hotu kauze fulan tolu ka haat ona, ita-nia problema ne’e saida loos,” tenik nia.

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo hateten, subsídiu ba sira ne’e bazeia ba oráriu servisu.

“Sé sira servisu loron 20 sei pagamentu loron 20, servisu loron 60 pagamentu mós tuir hanesan ne’e. Maibé karik iha doutór balun ne’ebé seidauk simu, ha'u hanoin buat hotu nakloke bele halo karta ofisial ba ministériu atu bele haree sira,” dehan nia.