Governu agora daudaun ta'uk hela tanba bainhira orsamentu retifikativu la pasa, tanba ema barak ne’ebé servisu nu’udar kontratadu iha ajénsia Estadu nian kesi hela sira nia vida ba orsamentu ne’e.

Governu la sita klaramente ema na’in hirak mak oras ne’e daudaun servisu nu’udar funsionáriu kontratadu, maibé posibilidade boot ema hirak ne’e sei ‘kesi kabun’ tanba sira nia saláriu depende ba orsamentu retifikativu.

Ministru Presedénsia Konsellu Ministru, Adriano do Nascimento hateten, kestaun urjénsia Estadu ne’e iha perigu nia laran baihira orsamentu retifikativu la pasa. Funsionáriu kontratadu ho emprezáriu lubuk ida sei hetan konsekuénsia.

Nia dehan, orsamentu retifikativu ne’ebé tuir planu Governu hakarak aprezenta ho karakter urjénsia, maibé deputadu sira rejeita. Ne’e duni Governu iha dilema no susar nia laran.

“Tusan ne’ebé Estadu la selu no ema nia osan barak iha ita no ita selu multa aumenta beibeik”, tenik Adriano, iha Uma Fukun PN, horisehik.

Nia dehan, to’o oras ne’e orsamentu anuál mós seidauk iha konserteza. Funsionáriu kontratadu lubuk ida hapara servisu. Nune’e agora daudaun funsionáriu rihun ba rihun mak servisu hela.

Agora daudaun Governu hein hela debate orsamentu retifikativu, ne’ebé Prezidente Parlamentu rasik despaxa ona ba komisaun sira atu debate, maibé to’o oras ne’e la funsiona.

Tuir nia, bainhira komisaun la funsiona di'ak konsidera deputadu halo boikota iha Parlamentu Nasionál. Tanba ne’e, la bolu Governu halo audiénsia hodi justifika kona-ba orsamentu retifikativu ne’e rasik.

Governante ne’e dehan, hahalok sira ne’ebé deputadu komisaun sira halo ba Governu signifika fó ameasa ba VII Governu nia ukun nasaun ne’e.

Bainhira deputadu sira mak la tama halo diskusaun orsamentu retifikativu ba daruak, konsekuénsia mak Estadu ne’e hamosu krize ekonomia.