Aniceto dehan, karta rua ne'ebé hatama, ba Tribunál Rekursu atu halo fiskalizasaun abstratu tuir dala justisa. Nune’e, ida seluk ba Tribunál Distritál Dili (TDD) ba akuzasaun sira ne'ebé deputadu AMP sira halo.

Prezidente PN sente deputadu AMP halo akuzasaun tanba dehan, injustifikavel no inkapasidade ba jestaun no kontrolu administrasaun no mós rekursu umanu.

Tuir Aniceto, ne’e hanesan akuzasaun ne’ebé jenérika tanba la hatudu fundamentu faktuál ka jurídiku ruma.

Prosesu hotu agora iha ona Tribunál Rekursu hodi hein rezultadu, maibé ba funsionamentu Parlamentu Nasionál nian kontinua la’o nafatin.

Aniceto sai Prezidente PN liu husi dalan demokrátiku, iha loron 5 Setembru 2017. Tanba ne’e, maski mosu dezafiu barak, maibé sei kontinua jere PN to’o desizaun Tribunál hasai ka iha ona destituisaun definitivu.

Iha momentu ne’e kedas diáriu ne’e tenta atu halo konfirmasaun ba parte AMP, maibé sira sei presiza rona no haree vídeo husi deklarasaun Prezidente PN nian hafoin bele fó komentáriu.

“Ami presiza haree lai nia filmajen depois mak ami fó komentáriu” dehan Prezidente Bankada PLP, Fidélis Magalhães.

Antes ne’e, Prezidente Bankada KHUNTO, Luis Roberto hatete, AMP halo karta destituisaun ba Prezidente PN, tanba iha loron 21 Novembru, enkontru lider bankada AMP hatama karta rekursu ba demisaun orsamentu retifikativu no mosaun sensura ba meza PPN, maibé ignora de’it.

Nune’e, bankada tolu opozisaun ne’e hasoru tan Prezidente PN atu ko’alia kona-ba ajendamentu ba rekursu ne'ebé hatama ne’e, maibé kontinua ignora.

“Ami nia karta rekursu mós ignora, ami hasoru mós ignora. Tanba ne’e, ami AMP foti desizaun hodi halo karta destituisaun ba Prezidente Parlamentu Nasionál” dehan Luis, iha Uma Fukun PN, horisehik.

Ho situasaun ne’e, AMP hanoin katak Prezidente PN halo atendementu la imparsiál. Hali'is liu ba deputadu 30, la'ós sai prezidente ba deputadu 64 iha Uma Fukun ne’e.