Interese husi estadu Kuba ne’e hatudu liu husi enkontru entre Embaixadora Kuba iha Timor-Leste, Grisel Alina Aldama Innis, ho Ministra Edukasaun Timor-Leste, Dulce de Jesus Soares.
Hafoin enkontru, Embaixadora Grisel hatete, enkontru ho Ministra Dulce ne’e atu koalia kona-ba kontinuasaun kooperasaun iha seitor edukasaun entre Kuba ho Timor-Leste.
Nia dehan, estadu Kuba hakarak atu kontinua apoiu Ministériu Edukasaun liu husi fasilita formasaun ba professor ensinu pre-eskolar to’o ensinu sekundaria, privadu no públiku, inklui tekniku hodi hasa’e koñesimentu no abilidade professor sira atu transmite siensia ba estudante ho kualidade.
Aleinde ne’e, nia dehan, koalia mós kona-ba kooperasaun entre Kuba ho Universidade Nasional Timor Lorosa’e (UNTL) hodi fasilita formasaun lingua español ba estudante Fakuldade Medisina hodi bele kontinua estudu iha Kuba.
“Ami koalia ho Ministra Edukasaun hodi servisu hamutuk ho Universidade Nasionál Timor Lorosa’e hodi fasilita formasaun lingua Español ba estudante Fakuldade Medisina hodi kontinua sira-nia estudu iha Kuba. Tanba ne'e ami kontente hasoru ho Ministra hodi konversa no halo diskusaun klean ba oin servisu hamutuk iha setor edukasaun," informa Grisel hafoin enkontru, iha salaun ME, Vila Verde, Dili, Segunda (30/10).
Diskusaun ne’e, nia hatutan, importante tebes hodi fó espasu no halo analiza ba kontinuasaun projetu entre Timor-Leste ho Kuba ba oin.
Iha fatin hanesan, Ministra Dulce afirma, enkontru ho Embaixadora Kuba ne’e koalia kona-ba area edukasaun, tanba sira hakarak reativa fali akordu ne'ebé iha hafoin Timor-Leste ukun an.
Durante ne’e, nia dehan, Kuba ajuda buat barak iha area edukasaun nian, liu-liu iha alfabetizasaun, maibé programa sira ne'e to'o ohin loron la kontinua, tan ne’e Kuba hakarak servisu hamutuk ho Ministeriu Edukasaun Timor-Leste hodi kontinua no hadia di’ak liu tan.
"Iha area ne'ebé ami identifika ho area ne'ebe mak espesial ba ita-nia formasaun ekivalensia to'o de’it iha ensinu baziku no ensinu sekundaria, ami haree mós iha posibilidade, Kuba bele ajuda edukasaun atu dezenvolve ba programa ekivalensia ba ensinu sekundaria no povu oan sira ne'ebé presiza edukasaun," dehan Ministra Dulce.
Iha esperensia pasadu, nia dehan, ME servisu hamutuk fó formasaun ba materia fizika, maibé tanba laiha kontinuidade tan ne’e ME hakarak kontinua fali kooperasaun ne’e.
Asuntu seluk ne’ebé interesante, nia dehan, Kuba servisu ho UNTL hodi fó formasaun lian Español ba estudante Fakuldade Medisina hodi kontinua estudu iha Kuba.
