Xefe Departamentu Banku de Sangue, HNGV, Claudio Quintão hatete, stock raan ne’ebé daudauk ne’e iha hamutuk pakote 14 kompostu husi tipu raan B+ pakote 9 no tipu AB pakote lima, enkuantu raan tipu O+ daudaun stock laiha.

Atu bele priense stock ne’e, nia dehan, nia parte halo aprosimasaun ho parte hotu hodi bele halo doasaun raan.

“Ha’u husu mós ba komunidade hotu iha Timor laran tomak, ne'ebé  mak iha disponivel bele fahe domin liu husi doasaun raan atu tulun pasiente sira ne'ebé mak presiza raan, liu-liu sira ne'ebé  baixa iha HNGV,” dehan nia, iha nia knar-fatin, Segunda (30/10).

Molok ne’e, Diretora Servisu Apoiu Diagnostiku no Terapiotiku (SADT), HNGV, Mingota da Costa Herculano informa, daudaun HNGV enfrenta problema ho stock raan.

“Defisil tebes ita atu hetan raan neebé sufisiente hodi bele kobre nesesidade pasiente sira nian,” dehan nia.