Tuir Rural Development TVET Officer, Tendy Gunawan hatete, objetivu husi Internasional Labour Organization (ILO), atu apoiu traballadór iha setór agro-florestál nian, tanba haree ba mudansa klimátika iha Timor-Leste.

Nia dehan, ko'alia kona-ba traballadór, sei la sees husi Ministériu Edukasaun (ME) , tan ne’e ILO presiza servisu hamutuk ho instituisaun no Ministeriu relevante atu apoiu formasaun hodi hasa’e kapasidade estudante sira no mestri sira iha area agro-florestál nian.

“ILO hanesan organiazasaun ida iha ONU nia okos entau halai liu ba traballadores, tan ne’e ami presiza servisu hamutuk ho instituisaun ka ministériu relevante atu hasa’e kapasidade estudante inklui mestri sira,” dehan Rural Development TVET Officer, Tendy Gunawan iha Salaun VIP-ME Vila-Verde, Tersa (13/02).

Nia afirma, haree ba mudansa klimátika ne’ebé afeita mós iha TL, tan ne’e oinsa ILO atu servisu hamutuk ho parte Ministériu Edukasaun (ME) atu tau ideas hamutuk hodi bele rezolve ligasaun ho mudansa klimátika karik akontese.

Orsamentu ne’ebé Uniaun Europeia hodi halo projetu refere ho montante hamutuk Euro 5.9 milloes, no nia durasaun tinan haat (4).

Iha fatin hanesan, Sekretáriu Estadu Ensinu Sekundariu Jeral no Ensinu Sekundariu Tékniku Vokasinal (SEESJESTV), Domigos Lemos Lopes hatete, parte edukasaun nia halo audiénsia ho ILO, maibé ko'alia kona-ba formasaun, tan ne’e parte edukasaun nia sujere hodi fó formasaun ba mestre no estudante husi tékniku vokasionál.

Enkuantu, eskola haat (4) ne’ebé ILO identifika hodi atu fó fórmasaun kona-ba area agro-florestál mak Eskola Sekundáriu Tékniku Vokasional (ESTV), Eskola Agrikultura iha Maliana Bobonaru, ESTV Oekuse, ESTV Natarbora Manatuto no ESTV Fuiluro Lautem