Liu husi karta ho númeru referensia 99/CPF-PNTL/X/2023 ne’ebé asina husi Komandante Komando Pesoal no Formasaun, Superintendente Xefe Polisia Arquimino Ramos, ho data 06 Outubru ne’e, husu ba polisia reformadu 158 atu aprezenta an iha 9 Outubru, ohin.
Iha karta ne’e hatete katak notifikasaun ba ofisial, sarjentu no ajente 158 ne’e atu haktuir rezolusaun númeru 43/2023 loron 4 fulan Outubru kona-ba Reativasaun pesoal ho funsaun Polisia Nasionál Timor-Leste ne’ebé tama ona ba reforma tuir dekretu lei númeru 69/2023 loron 28 fulan Setembru.
Notifikasaun ne’e mós bazeia ba despaisu númeru 446/CG-PNTL/X/2023 kona-ba Reativasaun pesoal ho funsaun Polisia Nasionál Timor-Leste.
Ho nune’e, iha karta ne’e Komando Pesoal no Formasaun orienta ba polisia reformadu 158 atu aprezenta an.
“Komando Pesoal no Formasaun notifika ba ofisial, sarjentu no ajente 158 atu aprezenta an iha loron 9 fulan Outubru iha CFP—ba membru sira husi Komando Jeral, Munisipiu Dili no membru CFP rasik, no iha Komando Munisipiu no Unidade sira—ba membru sira ne’ebé antes ne’e hala’o knar iha fatin sira ne’e,” karta ne’e dehan.
Iha karta ne’e Arquimino husu ba Komandante sira atu komunika ho ofisial, sarjentu no ajente 158 no implementa tuir despaisu reativasaun ne’ebé hasai ona husi Komando Jeral PNTL.
Relasiona ho karta ne’e, Jornal INDEPENDENTE konfirma ho eis portavos Komando Jeral PNTL ne’ebé hetan mós reforma, Superintendente Xefe Arnaldo Araujo. Eis portavos ne’e hatete, nia simu ona despaisu refere.
Iha despaisu ne’e, nia dehan, iha 9 Outubru sira sei aprezenta an hodi hala’o hikas sira-nia servisu nu’udar membru PNTL.
"Sim, aban (ohin) loron 09 Outubru 2023 ami tama fali ona servisu, atu hahú hikas fali servisu, prosesu tuir mai Governu ho Komandu Jeral mak hatene, " dehan Arnaldo via telefone, Domingu (08/10).
Molok ne’e, Komandante PNTL, Komisariu Polisia Henrique da Costa deklara, nia parte sei hein despaisu husi Ministériu Interior (MI) molok reativa polisia reformadu 158.
"Ha'u husu ba kolega sira servisu ne'ebé mak iha parte Ministeriu Interior nian sei la'o hela, ita hein kuandu iha despaixu no lei ruma ne'ebé mak fó sai, ita kumpre no ita hakarak ka lakohi, Komandu PNTL ne'e tenke asegura desizaun estadu ho governu nian, saida mak governu sente di'ak ba nasaun, orienta, ita tenke halo tuir ida ne'e," dehan Henrique ba jornálista sira, iha Kuartel Jeral PNTL, Kaikoli, Dili, Segunda (02/10).
Henrique hatete, PNTL la'ós instituisaun ida ne'ebé independente katak laiha ema ida kontrola. PNTL relata ba Ministru Interior hafoin ministru hato'o ba nia superior.
"Ita asegura parte hotu, maibé tenke iha legalidade ruma ba iha Komandu PNTL par bele jere tuir legalidade, no ita koalia kona-ba reativa polisia reformadu na’in 158, maibé ita hakarak simu despaixu husi Governu ne'e númeru hira no halo publikasaun iha Jornál Repúblika ne'e númeru hira par ema hotu hatete, tanba polísia reformadu na’in 158 laos segredu par ita atu taka de'it, ida agora ita presiza ema hotu akompaña ida ne'e," katak nia.
Nia afirma, Komandu PNTL lakohi nonook bolu ema tama fali, maibé tenke iha baze legal ruma.
"Se ita nonok mak bolu tama fali sira mai laiha baze legal ruma, sira seluk husu bolu sira tama mai halo saida? Tanba ne'e ita presiza hetan tiha legalidade ho númeru hira no públika iha Jornál da Repúblika loron saida par ita re-ativa polisia reformadu 158, tuir nia legalidade mak ida ne'e, ita lakohi par ko'alia ba iha média oin seluk, depois rezultadu sai oin seluk, tanba ne'e ita implementa lei no orden, ita haree buat ne'e iha mak ita foin ko'alia no implementa," Komandante ne’e afirma.
Ba kestaun ne’e, Ministru Interior (MI), Francisco da Costa Guterres hatete, nia sei haruka despaisu ba Komandu PNTL kona-ba reativa polisia reformadu 158.
"Sim ida ne'e loos ona, agora hein públika iha Jornál Repúblika, ita espera ohin (horseik) no aban (ohin) bele públika ona. Ha'u sei haruka despaixu ba Komandu PNTL par halo re-ativasaun polísia reformadu 158, tanba sira seidauk sai, durante ne’e sira par de'it, la ba servisu, ne'ebé ami sei prepera despaixu ba ida ne'e," dehan nia.
Kona-ba kolokasaun ba membru hirak ne’ebé sei tama fali servisu, liu-liu ba ofisial superior sira, Francisco dehan, ida ne’e depende ba desizaun husi Komando PNTL.
"Superior sira atu tama koloka ba ne'ebé ne'e Komando PNTL mak hatene no iha irarkia Komandu PNTL mak sei jere,” dehan nia.
