Xefe Programa ba Moras Hadaet husi Relasaun Seksual, MS, Bernardino da Cruz hatete, númeru kazu ne’ebé sira identifika durante fulan neen ne’e mai husi postu saude sira iha Timor-Leste laran tomak.

“Durante fulan neen nia laran ita rejista inan isin-rua ne'ebé mak pozitivu ba HIV/SIDA hamutuk 15. Númeru ne'e ita-nia profisional saúde sira identifika iha fasilidade saúde sira iha Sentru Saúde to'o Postu Saúde sira iha territóriu nasionál," dehan nia iha nia knar-fatin, Lahane, Dili, Sesta (06/10).

Hafoin identifika kazu ne’e, nia dehan, nia parte sei entrega ba servisu saúde ba família hodi fahe informasaun kona-ba moras HIV/SIDA ba iha komunidade sira, atu nune'e bele garante populasaun sira-nia moris.

“Klaru katak (bainhira) populasaun sira hasoru moras ne‘e presiza ba fasilidade saude sira ne'ebé mak di'ak no ekipamentu ne’ebé ho kualidade (atu halo atendimentu),” dehan nia.

Molok ne’e, Prezidente Institutu Nasional Kombate HIV/SIDA, Daniel Marçal informa, kazu HIV/SIDA kontinua akontese tanba ema barak seidauk iha koñesimentu kona-ba moras refere.

“Ita hatene katak problema HIV ne’e problema seriu maibé laos problema foun, entaun prioridade mak ne’e ita tenke fokus liu ba prevensaun, kria estratejia ne’ebé simples atu ema hotu bele kompriende ho nia objetivu atu hatun kazu transmisaun,” dehan Daniel iha Parlamentu Nasionál, 21 Setembru liu ba.