Vise Prezidente PN husi bankada KHUNTO, Luis Roberto da Silva hatete, bankada FRETILIN, PLP no KHUNTO hakarak halo mudansa ba meza PN.

Nia dehan, rejimentu PN artigu 16 B fó liberdade ba kada deputadu no bankada sira atu hatama karta rekerimentu ba meza.

Bazeia ba rejimentu PN, nia esplika, Prezidente PN tenke fó resposta ba rekerimentu ne’ebé deputadu ka bankada sira hatama iha loron lima nia laran.

“Aban (ohin) tama ona ba loron lima, ne’ebé fiar katak Prezidente Parlamentu fó resposta ba karta destituisaun meza Parlamentu nian ne’ebé  haruka husi Bankada tolu,” Luis iha PN, Segunda (11/05).

Iha fatin hanesan, Vise Prezidente Bankada PLP, Francisco de Vasconcelhos hatete, iha desizaun ida iha periodu Estadu Emerjensia, orgaun sira  hanesan Parlamentu Nasionál, Prezidente Repúblika, Governu no Tribunál Rekursu funsiona normal.

Ho nune’e, nia dehan, laiha razaun ba Prezidente PN atu paraliza funsiomentu PN.

“Ami nota ona katak Prezidente Parlamentu halai sees husi nia responsabilidade,” dehan nia.

Atu labele akontese nafatin, nia hatutan, bankada tolu iha PN hatama ona pedidu distituisaun ba meza PN.

“Artigu 16 rejimentu Parlamentu Nasionál ne’e obrigatoriamente, hanesan sira balun interpreta dehan Prezidente Parlamentu tau ajenda mak foin (deside), ne’e interetasaun la loos.”

Tuir rejimentu PN, nia hatete, obrigatoriamente Prezidente PN tenke ajenda pedidu destituisaun ba meza PN iha loron lima nia laran.

“Aban (tersa-ohin) loron ikus, klaru katak prosesu sira tenke lao, laiha razaun par atu laiha, estadu labele monu ba ema idaidak nia hakarak, estadu la depende ba ema ida,” dehan nia.

Entretantu, segunda-horsehik Presidente Parlamentu Nasionál Arão Noe de Jesus deklara sei la ses husi nia kargu tanba rejimentu parlamentu no konstituisaun la fó.

Tanba ne’e, nia husu ba Bankada tolu, FRETILIN, PLP no KHUNTO atu respeita no hkaruk ba lei no konstituisaun.