Prezidente KI, Virgílio da Silva Guterres hateten, matadalan ne’e nu’udar regra normál no konduta ba jornalista no meiu komunikasaun sira atu la’o tuir bainhira hala'o atividade jornalizmu kona-ba asuntu Covid-19.

Prezidente KI mós husu ba jornalista no meiu komunikasaun hotu-hotu atu halo papél informativu no edukativu ho loloos hodi labele produs no publika notísia sira ne’ebé nia konteúdu sensasionál no hamosu pániku iha sosiedade leet.

“Jornalista ho média atu ajuda redús pániku, la’ós atu aumenta situasaun sai pániku liután. Kuandu média mós hamosu notísia sira ne'ebé sensasionál no espekulativu sei halo povu la hakmatek”, dehan nia.

Entretantu, giaun reportajen Covid-19 hetan apoia husi ajensia UNDP, SEKomS, AJTL, TPLU, SEAPA, IFJ, UNESCO, Dewan Pers Indonesia (DPI), LBH Pers Indonesia, PNTL, no Instituisaun sira seluk.

Matadalan Reportajen ba Covid-19;

1. Labele publika lia-fuan sira ne’ebé sensasionál no lia-fuan sira ne’ebé kontein ho estigmatizasaun.
2. Evita halo espekulasaun ba senáriu ne’ebé hatudu situasaun aat liu iha períodu propagasaun Covid-19.
3. Evita halo politizasaun ba asuntu Covid-19 ne’ebé ninia fonte informasaun mai husi polítiku sira.
4. Dirije sidadaun sira atu asesu ba fonte informasaun ofisial sira hanesan sentru integradu Jestaun krize no seluk tan.
5. Konfirma no verifika informasaun hotu-hotu ne'ebé espalla iha média sosiál sira antes uza nu'udar informasaun adisionál ba notísia ida.
6. Labele fahe tutan (share) informasaun sira ne’ebé espalla iha média sosiál ne’ebé nia konteúdu halo públiku pániku no ta'uk.
7. Esplika termu sira médiku nian ne’ebé iha relasaun ho Covid-19, nune'e bele ajuda sidadaun sira atu prevé moras aat ne'e.
8. Halo peskiza no inklui dadus sira iha notísia no tenke entrevista peritu sira atu fó sira nia perspetiva kona-ba perigu husi Covid-19
9. Labele publika pasiente pozitivu Covid-19 nia identidade, tantu nia naran, hela fatin ka serbisu fatin.