Prezidente Parlamentu Nasionál (PN), Arão Noe de Jesus hatete, governu halo pedidu mai iha PN husu debate OJE ne’e ho karakter urjénsia.

Husi komisaun C asuntu Finansas Publika halo pareser mai plenária aneksa ho kalendáriu debate nian. Tanba ne’e, deside hamutuk ona katak debate ne’e ho karakter urjénsia.

Husi inisiu Parlamentu Nasionál liu husi kada komisaun halo ona audiénsia publika ho liña ministeriál sira iha loron neen (6) hahú kedas iha loron 14 Agostu to’o 23 Augustu 2018.

Husi ne’e komisaun C PN halo relatóriu pareser audiénsia publika nian mai iha plenária hodi halo apresiasaun, tanba ne’e iha loron 28 Augustu hahú debate iha jeneralidade loron tolu.

Iha loron 1 Setembru kontinua debate iha espesialidade loron lima, tanba ne’e ohin loron 6 Setembru tuir giaun ne’ebé iha sei remata diskusaun iha votasaun finál globál.

Debate OJE ne’e remata iha finál globál bele halo ona redasaun finál ba relatóriu proposta lei OJE 2018 nian, atu nune’e iha loron 10 Setembru sei lori ba iha Prezidente Repúblika atu halo promulgasaun tuir lei ne’ebé iha.

“Iha giaun ne’e másimu loron lima, tanba ne’e kuandu iha loron ikus ne’e mak la halo hotu iha lokraik ne’e ita sei kontinua debate to’o madrugada hodi finaliza tiha diskusaun”, dehan nia, iha Uma Fukun PN, horisehik.

Giaun ne’ebé iha ne’e deside husi lider bankada sira, tanba ne’e hakarak ka lakohi tenke kumpre tanba ajenda ne’e rasik mak halo.

Arão hatete, debate loron tolu nia laran aprova orsamentu ba órgaun 12 no hela de’it 23, tanba ne’e ba loron haat no lima nian sei bele finaliza, maibé ne’e depende ba vontade deputadu sira nian kuandu insiste beibeik asuntu ne’ebé remata ona entaun to’o loron ikus ne’e hotu-hotu tenke responsabiliza.

Alende ne’e, iha loron ikus Presidente PN garante OJE 2018 sei pasa iha finál globál, tanba haree ba situasaun diskusaun iha Plenária laran opozisaun mós iha interese duni atu OJE ne’e tenke aprova atu normaliza situasaun ekonomia no mákina estadu.