Dadus ne’ebé Komisaun Anti Korrupsaun (KAK), Diresaun Nasionál Prevensaun aprezenta husi totál 47% funsionáriu públiku sira ne’e maioria asume kargu xefia hanesan Diretór Jerál, Diretór Nasionál no Xefe Departamentu.

Diretór Jerál Prevensaun KAK, Rosário Salsinha Araújo hateten, observasaun no peskiza ne’ebé halo identifika iha funsionáriu balun privatiza patrimóniu Estadu nian iha tempu férias.

“Peskiza ne’e hatudu liuliu ba kargu xefia sira, hanesan governante no kargu diretór no xefe departamentu sira”, dehan nia, iha Fomentu-Bebora, horisehik.

Nia esplika, bainhira patrimóniu Estadu ne’e utiliza sala bele fó risku boot ba nasaun, liuliu ba gastu orsamentu nian hodi halo manutensaun.

Meius ne’ebé Diresaun Nasionál Preventiva KAK halo maka sita ona karreta, motorizada no laptop balun ne’ebé funsionáriu sira uza iha tempu ne’ebé sala.

Kona-ba dadus, sei relata iha tempu badak hafoin finaliza relatóriu, tanba kazu ne’e la’ós akontese la'ós iha Dili laran maibé mós iha munisípiu sira hotu.

Haree ba envolvimentu funsionáriu sira iha abuzu podér, Diresaun Nasionál Preventiva KAK halo desiminasaun informasaun ba funsionáriu Sekretariadu Estadu Meiu Ambiente (SEMA) hodi halo prevensaun ba uzu patrimóniu Estadu iha tempu férias.

Hafoin soru-mutu, Sekretáriu Estadu Meiu Ambiente, Deometrio Amaral hateten, reuniaun ne’e importante atu bele garante boa govenasaun iha parte administrasaun.

Nia esplika, ba ema sira ne’ebé risku iha aprovasaun dokumentu aprovizionamentu atu hatene no sai hanesan matadalan atu garante boa governasaun administrasaun akontabilidade tuir lei.

Iha fatin hanesan, Xefe Departamentu Ambientál, Eliza Luzia Santa Ferreira hateten sosializasaun ne’e importante ba funsionáriu públiku atu hatene direitu no devér atu uza patrimóniu Estadu.

Tanba ne’e, bainhira iha doasaun ne’ebé apoiu husi ajénsia kona-ba karreta, haruka troka xapa matríkula hodi muda ba governu, atu iha tempu férias ema ema labele uza.