Reprezentante RNDJ-KRDTL, Antonio Ai-Tahan Matak informa, ohin, massa sei konsetra hamutuk iha sede nasional RNDJ-KRDTL iha Bairo Formoza hodi hato’o sira-nia opiniaun ba Angela hodi lori ba PR Lu Olo.

Massa hirak ne’ebé sei halibur-malu iha Formoza, Aitahan Matak dehan, la’os membru Unisma Ativista Pro-RDTL, maibé sidadaun sira ne’ebé vota ba FRETILIN no ba CNRT, ne’ebé la konkorda ho governu konstitusional daualu.

“Massa sira ne’e la’os mai husi Unisma Ativista Pro-RDTL, maibé sidadaun ne’ebé rekere nia votus 23 kadeira no 21 kadeira. Massa sira ne’e mak mai hato’o sira-nia direitu, aprezenta kestaun dehan ‘kadeira 5 mak ukun fali’, entaun massa sira sente la puas, nune’e hodi hato’o opiniaun liu husi karta ba exelensia Prezidente Repúblika.”

“Entaun Prezidente Repúblika iha kompetensia tomak atu loke karta ne’e hodi haree ida ne’ebé sala, oinsa mak atu bele hadia, tanba ema hotu la simu kadeira 23 no 21 la ukun maibé, kadeira 5 de’it mak ukun fali,” dehan Aitahan Matak iha Komandu Jeral PNTL Kaikoli, Kinta (16/07).

Nia hatete, massa sira ne’ebé mai halibur iha Formoza ne’e konsidera katak governu daualu nia ulun boot mak Xanana Gusmão no governu dasia nian mak FRETILIN.

“Governu daualu nia ulun-boot mak Kay Rala Xanana Gusmão. Governu dasia nian mak 23 kadeira, FRETILIN, maibé vota tiha, sira-nia ema ba fali membru ne’e mak sira la konkorda,” dehan nia.

Kona-ba manifestasaun, Reprezentante RNDJ-KRDTL ne’e dehan, sira sei la halo manifestasaun, maibé konsentra de’it iha sede RNDJ-KRDTL hodi hato’o opiniaun ba Angela hodi halo karta ida ba PR Lu Olo.

“La’os halo manifestasaun, ema hotu mai konsentra iha ne’ebá atu hato’o opiniaun ba Portavoz Angela Freitas hodi halo karta ida ba gabinete Prezidente Repúblika.”

Kona-ba ninia objetivu hasoru-malu ho Komandu PNTL, Aitahan Matak dehan, nia parte mai husu autorizasaun husi parte seguransa atu labele mosu instabilidade.

“Ida agora dadaun ami halo ne’e bolu naran konsentrasaun iha sede RNJD no Konstituisaun RDTL hodi aprezenta ami-nia opiniaun ba petisaun ne’ebé la konkorda desizaun PR nian,” dehan nia.

Nia esplika, Angela mak sei lori kestaun ne’ebé massa hato’o ba hasoru PR.

“Sei la mosu asaun ruma, atu marsa iha Dili laran ne’e laiha, tenke tuir regras ne’ebé vigora.”

Iha fatin hanesan, Portavoz Komandu PNTL Superentindente Xefe Arnaldo Araujo hatete, ekipa RNDJ-KRDTL mai hato’o sira-nia hakarak no objetivu.

“Ohin iha enkontru ne’e ami aserta buat balun, kona-­ba atividade ne’ebé atu halo aban, sira seidauk halo, parese iha tempu oin mai, maibé buat hotu tenke aserta ho PNTL.”

“La’os la aprova, maibé buat hotu tenke la’o tuir nia koridor, ohin ami ho sira koalia ona, aserta malu, hein katak iha tempu badak ita-boot sira sei rona,” dehan Arnaldo.

Kona-ba atu konsentra iha sede RNDJ-KRDTL, Arnaldo dehan, ne’e fila fali ba sira, maibé ba polisia mak buat hotu tenke la’o tuir regras.

“Karik bainhira mak sira hala’o petisaun ida ne’e, polisia hein de’it no akompaña nafatin,” dehan portavoz ne’e.

Iha fatin ketak, Komandante Jerál Polísia Nasionál Timor-Leste (PNTL) Komisáriu Faustino da Costa hatete, iha 14 Jullu, nia parte simu karta koñesimentu husi organizasaun balun atu halo manifestasaun.

Hafoin simu karta refere, nia dehan, nia parte bolu ona reprezentante organizasaun refere hodi haree kestaun legal no prosedimentu hotu-hotu.

“Loos duni katak Konstituisaun preve ema hotu-hotu bele halo asaun ho manifestasaun. Maibé, lei oan balun ne’ebé iha ne’ebá husu atu tuir prosedimentu ka rekejitus balun,” dehan nia.

Entretantu, Primeiru Ministru Taur Matan Ruak hatete, Timor-Leste nu’udar nasaun demokratiku, tan ne’e ema hotu-hotu iha liberdade atu aprezenta ninia petisaun.

“Ita-nia rai ne’e demokrásia, ema iha liberdade atu aprezenta ninia petisaun, nia opiniaun sira, ita respeitu ida ne’e,” dehan nia.