Eis Prezidente Parlamentu Nasionál no atual deputadu husi bankada CNRT, Arão Noe hatete, bainhira nasaun ida bolu nasaun direitu demokratiku, labele kriminaliza difamasaun.

“Ita hakarak Kódigu Sívil ba fali Kodigu Penál par bele tau hanesan krime públiku, ida ne’e ita hakiduk fila-fali ba kotuk hanesan era Soeharto (eis Prezidente Repúblika Indonézia) no era Salazar (eis Prezidente Portugál) nian, katak ita komesa proibi ona liberdade ema-nia liberdade espresaun,” dehan Arão iha PN, Kinta (16/07).

Nia dehan, bainhira Ministru Cárceres avansa ho esbosu lei refere tuir de’it gostu no haree de’it ba see mak ukun, aban-bainrua bele akontese persegisaun politika bi prizioneiru polítiku, bainhira ema halo interpretasaun oin-seluk.

Kona-ba razaun MJ Cárceres ba ema-nia onra, Arão dehan, se lider ida sentre prezudikadu ho lia-fuan balun, bele hato’o keixa, tanba kodigu sivil garante, tan ne’e la presiza kriminaliza.

“Tanba ne’e ha’u kontra prinsípiu ida ne’e, tanba demokrasia ne’e lakon tiha ona,” dehan Arão.

Tuir Arão, lider no Timor-oan sir abele foti lisaun balun ne’ebé Prezidente CNRT Kay Rala Xanana Gusmão hatudu.

Arão hatete, iha tinan 2018, bainhira nia sei sai nu’udar Koordenadór Juridisaun Aliansa Mudansa ba Progressu (AMP), nia halo keixa ida kona-ba karikatura Xanana nian.

Nia hatete, hafoin hato’o keixa ne’e, polisia konsege identifika no kaptura ema ne’ebé halo karikatura ne’e.

Maibé, bainhira Xanana rona kona-ba ida ne’e, Xanana hatete atu di’ak liu husik no lalika preokupa.

“Polísia ba to’o sede CNRT dehan ‘ami ka’er ona, prosesu bá oin ne’e halo nusa?’, ha’u ba konsulta ho Maun Boot Xanana Gusmão hanesan lideransa partidu CNRT, nia (Xanana) dehan ‘o ba preokupa ho buat kiik-oan sira hanesan ne’e, nusá la preokupa estadu no povu nia moris?’, entaun ha’u hakerek karta ida informa ba polísia katak ha’u perdua nia,” Arão konta.

Kaer ba inspirasaun husi Xanana, eis Prezidente PN ne’e hatete, sai ona figura públiku tenke prontu simu kritika lorloron.

“Ha’u uluk Prezidente Parlamentu (Nasional) mós kuaze loron-loron ema insulta, ema trata, maibé ha’u nafatin hela to’o agora. Sé ha’u hanesan ema sarani, se ema insulta ha’u, nia mak sala, see mak ba konfesa? Nia, la’os ha’u, tanba ne’e la presiza kriminaliza, aktu sivil iha,” dehan nia.

Tan ne’e, nia dehan, bainhira MJ Cárceres avansa, bankada CNRT prontu atu sai obstaklu iha PN.

“Bainhira governu kontinua avansa ho esbosu ne’e, bankada CNRT sei kontra, tanba esbosu ne’e sei lori mai Parlamentu Nasionál,” dehan nia.

MJ Cárceres Konsidera Públiku Analiza Sala

Iha fatin ketak, Ministru Justisa Manuel Cárceres dehan, laiha lei kriminaliza difamasaun, ida ne’ebé iha mak alterasaun Kodigu Penal Krime kontra onra.

“Laiha lei difamasaun maibé iha alterasaun, interpretasaun ne’e mak halo ema sai konfuzaun. Laiha lei ida naran Kriminaliza Difamasaun, iha de’it alterasaun Kodigu Penal krime kontra onra, interpretasaun sira mak la loos, la hatene Portugues ne’e mak hanesan ne’e karik,” dehan Ministru Cárceres iha salaun Komisaun Nasionál Eleisaun (CNE), Larigutu, Kolmera, Kinta (16/07).