Segundu Vise Primeiru Ministru, Koordenadór Asuntu Sosiál no Ministru Dezenvolvimentu Rurál no Habitasaun, Mariano Assanami Sabino hateten, semináriu internasionál ne’e hodi halo koordenasaun entre sivíl-Militár ba koordenasaun dezastre kalamidade ne’ebé akontese iha rejiaun ne’e.
“Governu TL apresia partisipante hotu ne’ebé mai husi membru rejiaun Ázia Pasífiku, partisipa iha semináriu internasionál ne’e, hein katak ninia rezultadu sei hamosu planu estratéjiku ne’ebé ho koordenasaun identifikasaun di’ak liu, atu bele halo atuasaun hamutuk ba dezastre naturais iha rejiaun ne’e”, dehan Mariano ba Jornalista hafoin partisipa abertura semináriu Regional Consultative Group (RCG), ne’ebé realiza iha Timor Plaza, (04/12).
Nia afirma, semináriu refere, ninia importánsia oinsá maka halo prevensaun, halo identifikasaun dezastre ne’ebé sei mosu, no oinsá mak halo koordenasaun institusionál entre sivíl ho militár, la’ós de’it iha TL maibé iha rejiaun ida ne’e.
“Tanba ita iha rejiaun ida de’it, ita iha dezastre ne’ebé maka ninia modelu kuaze hanesan, entaun ita presiza halo koordenasaun, tanba ne’e mak semináriu internasionál ida ne’e, espertu sira halo koordenasaun, halo planu programa ne’ebé di’ak liu hodi bele halo atuasaun bainhira dezastre sira mosu iha rejiaun ne’e”, tenik nia
Iha fatin hanesan, Sekretáriu Estadu Protesaun Sivíl, Domingos Mariano Reis, hateten enkontru liña koordenasaun sivíl-militár iha nasaun membru Ázia Pasífiku tomak ho objetivu atu hametin kooperasaun entre nasaun membru azia Pasifiku ida idak, sei fahe sira nia esperiénsia kona-ba dezastre naturais iha rejiaun ne'e.
“TL mós iha esperiénsia akontese ona kalamidade iha loron 4 fulan Abríl 2021, esperiénsia ne’e sei fahe mós iha momentu ida ne’e, tanba TL momentu ne’ebá ultrapasa situasaun ida ne’ebé akontese kalamidade hodi deklara apoiu multi nasionál, ida ne’e esperiénsia ne’ebé TL enfrenta ona, iha ne’ebé TL intervein no responde iha momentu ne’e hetan salva guarda ninia populasaun iha Dili”, dehan nia.
Tanba ne’e saida mak TL atu hetan iha semináriu internasionál ne’e, maka presiza atu hetan esperiénsia balun husi nasaun membru Ázia Pasífiku sira ne’ebé mak agora daudauk marka prezensa iha ne’e.
Entretantu semináriu internasional konaba Rejional Consultative Gruop (RCG) halao durante loron tolu envolve membru azia Pasifiku nasaun 15 hamutuk pastisipante nain 65 sei hamosu planu estratejiku junta sivil militar hodi halo koordenasain servisu salva vítima Dezastre naturais iha azia Pasifiku.
