Nia dehan, deklarasaun Prezidente Repúblika kona ba rekrutamentu professor rihun 3 ne’e la los no lakondiz ho prosesu no faktus ne’ebé iha.

“Deklarasaun públika husi Prezidente Repúblika kona-ba rekrutamentu professor rihun tolu ne’ebé MEJD halo iha periodu atu tama ba eleisaun 2023 la loos, tanba la kondis ho prosesu tomak no faktus ne'ebé iha,” dehan nia iha Salaun CCF, Komoro, segunda (04/12).

Eis Ministru ne’e esplika, bainhira nia simu mandatu iha fulan-Juñu tinan 2020, problema boot tolu ne’ebé sira hasoru mak, profesor sira ne’ebé mai husi governasaun anterior ezize ba Ministru Armindo atu resolve lalais professor voluntariu hahú husi tinan 2003-2020 hamutuk 5.588 ba professor kontratadu.

Aliende, professor kontratadu iha tinan 2014 hamutuk 4.902 ne’ebé ezize mós sira nia direitu atu ba professor permanente. Nune’e professor permanente sira nia progrensaun salariu paradu tanba lei la iha atu atualiza ba nivel.

“Nune’e iha ami nia mandatu ami esforsu makas atu buka solusaun ba problema sira ne’e mak hanesan, ami halo verifikasaun ba professor voluntariu sira hodi inisia prosesu rekrutamentu tuir vaga no orsamentu ne’ebé esplika no prepara lei atu akomoda professor kontratadu sira, liu husi ingresu espesial ba kareira dosente. Agora dadauk sira toma de pose tanba lei ne’ebé ami prepara,”tenik nia.

Eis Governante ne’e mós haktuir, lei ne’ebé sira prepara hetan promulgasaun husi Prezidente Republika iha loron 15 Maio no publika iha 30 Maio tinan 2023 antes mandate VIII Governu remata.

Nia hatuir, sira mós prepara lei ba professor permanente sira atu goza sira nia kareira dosente no subsidiu ba sira nia beem estar.

Prosesu no marka importante, nia hatutan, iha tinan 2021 to’o inisiu 2022, halo re-verifikasaun hodi hatene dadus loloos professor voluntáriu iha Timor-Leste laran tomak.

ME, nia deha, lansa mós vaga hamutuk 2.111 hodi rezolve vagas disponivel 975 husi Komisaun Funsaun Publika no troka 1.136 professor ne'ebé mate, reforma, hetan pensaun veliche, pensaun invalides no rezigna a'an.

Nia parte, Armindo hatutan, realiza prosesu rekrutamentu ba vagatura neʼebé iha tuir kritériu sira mak hanesan; kualifikasaun akademiku, antiguidade, assiduidade no tuir nesesidade eskola nian.

“Durante ami-nia mandatu, MEJD previstu atu rekuta profesor voluntáriu hamutuk 1.715, númeru ne'e inklui rekrutamentu ba professor 176 ba programa eskola iha uma.”

“Maibé husi total 1.715 ne'e, iha fim de mandatu ka fim Juñu 2023, ami konsegue realiza assina kontratu de’it ba 1.440 professores voluntáriu. La’os hatama profesor hamutuk 3.000 durante eleisaun.”

“Ami informa mós katak, depois liu tinan 10, primeira vez iha ami-nia mandatu, ami promove alterasaun ba estatutu karreira dosente hodi hametin liu tán karreira dosente, liu-liu kria kondisaun hodi fó rekoñesimentu loloos ba dosente sira no promove kualidade edukasaun. Alterasaun ba Dekretu Lei nú.23/2010,  9 Dezembru, Estatutu  karreira  Edukador Infânsia Professor Ensinu Baziku  Sekundáriu,” nia informa.

Dekretu lei ne’e, nia hatutan, hetan ona promulgasaun husi PR Horta iha 15 Maiu 2023 no publika ona iha Jornal Repúblika iha 31 Maiu 2023. 

Molok ne’e, PR Horta hato’o deklarasaun kona-ba rekrutamentu ba professor rihun 3 ne’e relasiona ho desizaun husi Ministériu balun iha governu dasia ne’ebé la renova kontratu husi funsionariu kontratadu sira.

Tuir PR Horta, ida ne’e akontese tanba governu daualu hasai ema CNRT no hatama ema rihun neen.

PR Horta hatete, iha governu daualu ne’ebé lidera husi Primeiru Ministru, Taur Matan Ruak, iha mós desizaun hodi hasai ema barak.

"Polítika nono governu konstituisionál nian hasai funsionáriu sira iha kada ministériu ne'e tanba governu anteriór besik eleisaun hatama ema rihun 3 kedas, hatama profesor rihun 3 kedas, duni sai ema CNRT purezemplu.”

“Purtantu hahú kedas ho oitavo governu. Agora nono governu hakarak hatama sira-nia ema, buat la'o nune'e. Loloos la devia partidariza, labele hatama tun-sa'e. Agora Fretilin satiadu fali, ita bo'ot sira mak foin hatama funsionariu rihun 3 durante eleisaun ne'e," dehan Horta hafoin selebra Proklamasaun Independensia ba tinan 48 ne'ebé realiza iha Palasiu Prezidensia Bairu-Pite, Tersa (28/11).