Tuir Embaixadór Japaun iha TL, Tetsuya Kimura hatete, edukasaun mak sai baze esensia tebes ba dezenvolvimentu nasaun nian hanesan, labarik no joven mak sei responsabiliza ba dezenvolvimentu ekonómiku no sosial nasaun ida nian iha futuru.

Nia haktuir, apoiu ne’ebé fó ba eskola rua ne’e atu mellora substansia iha zona rurais.

Tanba ne’e, nia dehan, ONG MAHON sei konstrui edifisiu eskola eskola primária Harekaın iha suku Raimea, Postu Administrativu Zumalai, Munisipiu Covalima no Fundasaun São Francisco de Assis sei konstrui edifisiu eskola sekundária iha Suku Clacuc, Postu Administrativa Fatuberitu, Munisipiu Manufahi, ho montante kada projetu hamutuk dolar amerikanu rihun $72.992.

Nia haktuir, projetu refere implementa liu husi Asistensia finansiamentu Projetu Komunitaria no Seguransa umana ne’ebé ho objetivu atu benifisia komunidade lokal liliu iha área remontas.   

“Iha eskema GGP, organizasaun lokál barak implementa projetu sira ne'e iha área rural. Sira ne'e parseiru importante no amigo konfiansa Embaixada Japaun. Permite ha'u espresa ha'u nia sinseru parabéns ba organizasaun rua, MAHON no Fundasaun São Francisco de Assis, ne'ebé eskolidu ona nu'udár benefisiariu tinan ida ne'e ni'an", dehan nia iha Salaun Enkontru Embaixada Japaun, Pantai Kelapa, Dili, (04/12).

Iha fatin hanesan Ministra Edukasaun Dulce de Jesus Soares, hato’o agradese Emabaixadór Japaun iha Timor-Leste, tanba apoiu ona konstrusaun ba eskola refere, hodi hasa’e kualidade edukasaun ne’ebé adekuadu.

"Agradese ba Governu Japaun tanba bele apoiu tan dala ida ba Ministériu Edukasaun ne'ebé ohin loraik asina tan kontratu ho fundasaun MAHON ho Fundasaun São Francisco Asis ne'ebé sei konstrui tan sala de aula foun," dehan Ministra Dulce.

Entretantu, Governante ne’e husu ba Jestor eskola rua ne’e, bainhira eskola ne’e pronto tenki kuidadu didiak atu nune’e estudante sira bele hala’o prosesu aprendizajen ho diak.