Polisia VPU-UNFPA Hala’o Advokasia ba Pasiente Sira iha Sentru Saúde Vera Crus Featured

By Estajiariu Junior Guterres Dezembru 04, 2023 1202
Polisia Unidade Vulnerabilidade hamutuk ho Fundus Nasoens Unidas ba Populasaun halo advokasia kona ba papel saúde nian atu halo atendementu ba kazu sobrevivente no mós violensia bazeia ba jeneru, ba komunidade no pasiente sira iha Sentru Internamentu Vera Crus. Foto:INDEPENDENTE/Ivonia. Polisia Unidade Vulnerabilidade hamutuk ho Fundus Nasoens Unidas ba Populasaun halo advokasia kona ba papel saúde nian atu halo atendementu ba kazu sobrevivente no mós violensia bazeia ba jeneru, ba komunidade no pasiente sira iha Sentru Internamentu Vera Crus. Foto:INDEPENDENTE/Ivonia.

DILI: Polisia Unidade Vulnerabilidade hamutuk ho Fundus Nasoens Unidas ba Populasaun halo advokasia kona ba papel saúde nian atu halo atendementu ba kazu sobrevivente no mós violensia bazeia ba jeneru, ba komunidade no pasiente sira iha Sentru Internamentu Vera Crus.

Enkuantu, sosializaun ne’e hanesan parte ida hodi selebra loron 16 ativizmu kontra violensia bazeia ba jeneru ho tema “Hamutuk investe iha familia hodi prevene violensia hasoru feto no labarik feto”.

“Prezensa VPU nian iha sentru saúde refere atu fahe informasaun kona ba violensia bazeia ba jeneru no violensia domestika, tanba VPU nia servisu mak atu atende mak ba kazu violensia domestika. Ita ko’alia kona ba violensia bazeia ba jeneru, ida ne’e importante tebes,”dehan Xefe Polisia VPU, Inspetor Anita Quadros, iha Sentru Saúde Vera Crus, segunda ne’e (04/12).

Iha fatin hanesan, Xefe Sentru Saúde Vera Crus, Marilia Piedade hatete, Polisia VPU no UNFPA fahe informasaun iha sentru saúde refere tanba sentru saúde ne’e iha ona fatin atu halo atendementu ba vitima violensia domestika sira.

Tanba ne’e, nia afirma, atividade ne’e importante tebes atu fahe informasaun ba komunidade no pasiente sira oinsa atu halo prevensaun ba violensia bazea ba jeneru.

Tuir nia, durante fulan sia nia laran, hahú husi fulan-Marsu to’o Novembru tinan ne’e, Sentru Saúde Internamentu Vera Crus durante halo ona atendementu ba vitima violensia bazeia ba jeneru hamutuk 300.

"Depois de hari sentru ida ne'e, ami registu ona pasiente ba kazu refere, kuaze 300 ne'ebé mai iha ami nia fatin hodi hetan tratamentu no nia rezultadu diak,”dehan nia.

“Atendimentu iha ne'e, oinsa fornese liña dahuluk maka oinsa ho pasiente ne'e mai kanek ita kura, se balun mai presiza psikologiku ami fo kedas oinsa hanorin sira no konselin se nia mai ho violensia emosional no violensia fiziku ne'ebé ho kanek ami sei fó liña dahuluk oinsa atu kura sira,”tenik nia.

Entretantu, nia haktuir, tipu kazu violensia domestika ne’ebé sira rejistu mak hanesan, violensia fiziku, violensia emosional no ekonomiku.

Rate this item
(0 votes)
Last modified on Segunda, 04 Dezembru 2023 17:59

Independente Digital TV