Iha 30 Agostu 1999, povu Timor Leste tomak ne’ebé tama iha idade votus, hakat ba sentru votasaun hodi deside hamutuk nafatin ho Indonezia ka ukun rasik an.

Maske mosu intimidasaun oioin molok no durante loron Konsulta Popular, maibé prosesu atu deside rasik ninia destinu konsege realiza duni.

Iha 4 Setembru 1999, bainhira Organizasaun Nasaun Unidas anunsia katak 94.388 ka 21.5% apoiu autonomia no 344.580 ka 78.5% rekuza no hili fahe malu ho Indonezia, intimidasaun no terror to’o ninia tutun. Sunu uma no oho ema mosu iha fatin-fatin.

Xefe Estadu Maiór Jenerál Falintil Forsa Defeza Timor Leste (F-FDTL), Tenente Jenerál Domingos Raul ‘Falur Rate Laek’ konsidera 4 Setembru nu’udar loron importante ba Timor-oan sira.

Maske iha loron ne’e mosu masakre balun, maibé anunsia kona-ba vitoria Timor Leste nian halo Timor-oan hotu-hotu haksolok.

"Loron 4 Setembru ida ne'e ita valoriza, ita hahi, ita hanai ita-nia eroi, martir sira ne'ebé espesiál mate iha loron 4 Setembru mai oin, depois anunsia rezultadu ne'e," dehan Falur hafoin enkontru ho Xefe Estadu iha Palasiu Prezidensia Bairu-Pite, Segunda (04/09).

Tuir nia, asuwain sira-nia raan ho isin ne’ebé fase rai ida ne'e sai tiha fali adubu di'ak ba rai Timor Lorosa'e.

“Ne'ebé ema hotu luta hamutuk fila rai ne'e hanesan Jardim ida loron ikus nian, Jardim de Pas,” dehan nia.

Iha fatin ketak, Ministru Asuntu Kombatentes Libertasaun Nasionál, Gil da Costa Monteiro ‘Oan Soru’ hatete, sofrimentu lubuk ida ne’ebé povu Timor Leste hetan durante tinan 24 nia laran hotu iha 4 Setembru 1999.

“Iha loron ne’e duni ita hotu rona rezultadu konsulta popular, katak ohin loron rezultadu fó sai Timor manan nia independensia, (manan) husi terus tinan 24 nia laran,” dehan Oan Soru.

Tanba ne’e, nia husu ba povu Timor Leste tomak, liu-liu foin-sae sira, atu halo reflesaun hodi reafirma saida mak ohin atu, ba oin atu halo saida no atu lori nasaun ho povu ne’e ba ne’ebé.

“Ema hotu aseita familia sira mate durante tinan 24 nia laran hodi sosa independensia, ne’ebé Timor-oan hotu-hotu ba hamrik iha urnas nia oin hodi fó sira-nia votus, maske sira hatene sira-nia votus ida ne’e sei determina sira-nia mate, maibé sira voluntariamente ho vontade oferese sira-nia mate tanba libertasaun patria mak boot liu.”

“Familia lubuk tanis haksolok tanba ita hetan ukun aan, balun tanis tanba lakon familia, maske nune’e ohin ita ukun an. Ita halo reflesaun ba tinan 24 depois de rezultadu konsulta polular,” katak nia.