Tuir dadus, iha 22 Dezembru, MS deteta pozitivu Covid-19 na’in 2 iha kuarentena Dili. Iha 23 Dezembru, deteta kazu pozitivu ida iha Dili no tolu (3) iha Oekusse, no iha 24 Dezembru deteta tan kazu pozitivu 3 iha Dili.
Hafoin deteta, parte saúde koloka kedan pozitivu sira iha fatin izolamentu Vera Kruz Dili, no fatin izolamentu iha Oekusse.
Ho númeru kazu foun ne’ebé as, MS kontinua apela ba sidadaun sira hotu iha rai laran atu halo prevensaun liu husi fase liman bebeik ho sabaun, uza maskra, no mantein distansiamentu fiziku.
“Espera pelumenus ba populasaun hotu ba Igreja ka ba merkadu ka fatin ne'ebe de'it ita-boot sira hakarak ba pasiar, lori ita-boot sira-nia handsanitazer tanba orsida ita nia liman kona iha fatin ne'ebe de'it uza nafatin dezinfetan ba ita-boot sira-nia liman atu nune'e moras labele kona ita,” dehan Ministra da Saúde (MS) Odete Maria Viegas iha salaun SAMES, Kampung Alor, Kinta (24/12).
Ministra Odete dehan, fulan ida ne’e kazu pozitivu Covid-19 sa’e ba na’in sia, tan ne’e husu komunidade tomak kuidadu teb-tebes, tan ne’e MS tenke halo jestaun ida ne’ebé di’ak ba kazu sira ne’ebé mak iha.
“Kazu sira ne’e asimptomatiku. Dala-ruma tanba de’it kazu ne’e asimptomatika entaun ita haree dehan ema la ta’uk, ema hanoin buat ne’e bosok tanba sira rasik la sente moras, maibé iha laboratoriu hatudu katak pozitivu maibé ninia sintoma komu laiha entaun ema sente ida ne’e laiha problema,” dehan nia.
Ministra dehan, iha fulan kotuk kazu sempre mosu ida, maibé iha fulan Dezembru kazu pozitivu mai ho númeru ne’ebé boot tebes, tanba ne’e MS sei la tuur nonook, nafatin koko atu konvida parseiru no ajensia no mós minsteriu sira ne’ebé mak durante ne’e servisu hamutuk atu bele haree hamutuk saida mak tenke halo.
“Tanba durante ne’e ita para servisu balun, hasnesan uza maskra, fase liman, ita koko atu kolia nafatin kada fulan kuandu kazu ida iha, ita tenke haree, ita hotu sente dehan ida ne’e hanesan hahalok preventivu ida,” nia afirma.
Maske númeru ne’e sa’e, nia hatete, seidauk iha desizaun atu implementa lockdown tanba seidauk iha transmisaun lokal.
“Tan ne’e kazu sia ne’ebé maka iha, ami seidauk foti dezisaun ne’ebé klaru hodi hapara servisu tomak, prontu ita laiha transmisaun iha ita-nia rai laran, kazu hirak ne’e importadus hotu,” dehan nia.
Molok ne’e, Arsebisu Metropolitanu Dili, Don Virgilio do Carmo da Silva hatete, igreja Katolika sempre apoiu no implementa regra EE hanesan uza maskra, fase liman beibeik ho sabaun, no halo distansiamentu fizika.
“Igreja fó apoiu nafatin, liu-liu ba regra sira ne'e hotu, uza maskra, distansiamentu buat hotu, ida ne'e ha'u hanoin apela la'os de'it uza maskra de'it maibé fase liman beibeik ho sabaun,” dehan Don Virgilio.
Maske nune’e, tuir observasaun jornalista jornal INDEPENDENTE, durante selebrasaun misa Natal, iha 24 no 25 Dezembru 2020, sarani barak la kumpre regra prevensaun Covid-19, liu-liu la uza maskra no la mantein distansiamentu fiziku.
Ezemplu ida mak iha selebrasaun misa Natal iha 25 Dezembru iha Parokia Ai-mutin, Komoro, Dili.
Migrasaun Taka Fronteira-Aeropontu
Entretantu, Diresaun Jerál Servisu Migrasaun (DJSM) iha 24 Dezembru 2020 to’o 2 Janeiru 2021 deside taka temporariu fronteira terestre, aeroportu no portu, tanba kazu foun covid-19 hahu mosu hikas iha Timor-Leste.
Diretor Jeral Servisu Migrasaun, Superintendente Asistenste Polisia Luis Barreto hatete, tuir despaixu temporariamente sei taka postu fronteira terestre, aeroportu no portu durante loron 10.
“Ita deside taka temporariu, tanba sidadaun Timor-oan ne’ebé foin fila husi estranjeiru hanesan Indonezia no Europeia iha nain 9, dadaun ne’e hetan ona pozitivu ba covid-19,” dehan nia.
