Assanami husu ema hotu nia kolaborasaun atu halo kritika hasoru Governu liu husi Ministériu Solidariedade Sosial no Inkluzaun (MSSI) kona-ba sistema pagamentu ne’ebé sempre rejulta idozo sira mate la ho dignu.

Tuir observasaun online INDEPENDENTE, loron 18 Dezembru, hatudu katak idozo sira maioria fuk mutin ona, difisiente ain, no seluk tan tenki obriga an forma iha BNCT hodi dudu malu, trata malu, no hakilar malu too ikus rejulta idozo ida, Agostiho Moniz (idade 65) husi Suku Maskarenhas, Postu administrativu Vera Cruz monu mate.

“Hotu-hotu tenki fó soliedariu ba ita nia aman ne’e no husu atu tenki hadia sistema ne’e ho diak, BNCTL tenki iha kareta movel ne’ebe atende ba ferik katuas sira iha uma, la’os mai antri ida dalan sira,”dehan Assanami.

Assanami husu atu hadia mekanismu ne’e, nune’e BNCTL nia kareta seidauk to’o, estadu tenki sosa kareta atu nune’e bele apoiu fahe osan ba ferik-katuas sira to’o iha uma ida-idak.

Tanba tuir Assanami katak ferika-katuas to’o ona tinan 60 sira sai eroi ba nasaun. Sira konsege hakiak no konsege kuidadu bebe-oan ida sai joven no sai lider, ne’e hotu mai husi ferik katuas sira.

Tanba ne’e mak fó orgullu ba sira no fó rekoñesimentu ba sira nudar eroi hodi fó osan terseira idade ba sira nune’e tenki buka mekanismu ne’ebé di’ak.

Entretntu, Xefe Suku sira mós husu ba Governu liu husi MSSIatu hadia sistema pagamentu ba idozu sira.

Tanba ne’e, tuir Xefe suku Maskarenhas, Postu Administrativu Vera Cruz, Rui Ilidio de Araujo hateten, matebian Agostinho monu bainhira forma hela atu simu osan iha BNCTL hafoin dudu malu iha formatura, nune’e familia lori ba baixa iha HNGV, maibé ikus mai iha loron 22 fulan-Dezembru nia hakotu iss.

“Katuas ne’e monu iha loron sesta feira bainhira pagamentu ne’e hahu iha postu vera cruz ba idozo no Bolsa da Mae,”dehan nia iha CCD ohin

Hanesan autoridade fó kulpa ba ministériu relevante la’os ba BNCTL, tanba ministériu la haree nia programa ou estratejiku durante tinan hira nian ne’ebé idozo sira sempre sena malu iha BNCTL.

Ministériu la haree ba ida ne’e, maibé aumenta tan fali Bolsa da Mae nune’e idade rua ne’e tuir malu hela.

“Hanesan buat ida dehan ita kondena idade rua ne’e auto fiziku iha ne’eba tanba idade ho 40, 50 no 60 ne’e mak forma iha ne’eba (BNCTL)”.

Tanba ne’e Xefe Suku husu atu hadia mekanismu tanba iha ne’eba iha ministra, vise ministra durante halo saida no tanba saida mak la fó kompetensia ne’e ba iha suku sira.

Foin dadauk iha pagamentu ba agregadu familiar ne’e, Xefe Suku hotu halo pagamentu ba nia populasaun sira no ikus mai sira lori fali osan restu ba kofre estadu, maibé tanba sa ohin loron pagamentu ba idozu sira ne’e, MSSI la fó konfiansa ba Xefe Suku sira.

Xefe suku ne’e mos husu ba PM atu haree didiak MSSI ne’e bele halo servisu ka lae, ministru no vise laiha kompetensia diak liu hasai.

“Hanesan Xefe Suku ami prontu atu ba hatan bainhira sala utiliza osan Governu, maibé labele defende fali imi (MSSI) nia programa no estratejia no la hare ba kompetensia suku nian,”dehan nia.