Komisaria KDL, Dinora Granadeiro hateten traballu infantil iha luron ou hala’o atividade negosiu iha kapital Dili deskonfiansa balu la’os mai de’it husi Oekusi.

"Ha’u admira bainhira KDL nia ekipa tuun direita ba entervista labarik sira ne’ebé fa’an manutolun no pentolan balu lahatene lian baikeno (lia-Oekusse) no lahatene sira nia origin nomos la hatene sira nia inan-aman nia naran tanba ne’e KDL deskonfia katak labarik sira ne’e la’os ema Oekusi karik,"dehan Dinora liu via-telefone ba Online Independente ohin.

Tanba ne’e, KDL informa ona ba parte Polisia Nasional Timor-Leste (PNTL) liu husi Polisia Imigrasaun atu buka tuir labarik sira ne’e, sekarik tebes duni tenke deporta sira.

Deskonfia katak labarik balu mai husi Kefa ou Atambua-Indonesia hodi buka osan iha Dili tanba ne’e husu ba PNTL atu indentifika.

"Naran no foto sira ne’e KDL submete ona ba PNTL imigrasaun hodi buka tuir, KDL seidauk bele publika labarik na’in hira mak deskonfia husi Indonesia, Kefa ka Atambua tanba sei iha investigasaun nia laran, karik informasaun ida ne’e loos publiku sei hatene iha tempu badak,"dehan nia.

Nia hateten kazu ne’e informa ona ba Presidente RAEOA no sira sei servisu hamutuk hodi fó solusaun iha tempu badak nia laran.

Tuir dadus prelimária KDL hatudu katak traballu infantil husi Oekusi iha Dili hamutuk na’in 300. Dadus ne’e la inklui labarik sira ne’ebé deskonfia mai husi rai liur (Kefa, Atambua-Indonesia).