Professor na’in 5 ne’ebé simu salariu $80 kada fulan mak José de Sousa hanorin materia lian Portugues, Lucio hanorin materia lian Tetun, Sergio hanorin materia Desportu, no José da Silva hanorin materia lian Melayu.

Profesor na’in lima ne’e simu de’it salariu $80/fulan tanba sira-nia estatutu sei sai nu’udar voluntariu. Osan ne’ebé selu sira mai husi parte eskola rasik.

Diretór ESJ 10 Dezembru, Domingos Xavio Gusmão informa, voluntariu ne’ebé haknar an iha ESJ 10 Dezembru hamutuk na’in 7, kompostu husi professor na’in 5, cleaner na’in ida no guarda eskola na’in ida.

Entre professor voluntariu na’in lima ne’e, nia dehan, na’in ida mak simu salariu $225, enkuantu na’in 4 seluk ho salariu $80.

“Ha’u preokupa tebes ho ha’u-nia professor na’in 4 ne’ebé mak kontribui ona sira nia matenek ba ita-nia oan sira, ho nune’e ha’u hakarak husu ba governu liu husi MEJD atu nune’e bele tau-matan mós ba ita-nia professor sira ne’e,” dehan nia iha edifisiu eskola, Komoro, Kuarta (23/12).

Tuir nia, Ministériu Edukasaun, Juventude no Desportu (MEJD) presiza tau-matan ba professor voluntariu sira atu nune’e bele hasa’e di’ak liu tan kualidade ensinu sekundariu públiku.

Molok ne’e, Ministru Edukasaun, Juventude no Desportu Armindo Maia informa,  iha tinan 2021 MEJD planu atu halo rekrutamentu ba professor sira hamutuk  975 hodi hanorin iha Ensinu Baziku, Ensinu Sekundariu no Tekniku Vokasional.

“Ami sei fó rekruta ba professor sira ne’ebé mak hala’o voluntariu durante tinan 7 ona, maibé to’o agora sira sei kontinua nafatin ho estatutu ne’ebé mak voluntariu, ida ne’e mak ami sei rekruta sira iha tinan 2021 mai,” dehan nia.

Molok halo rekrutamentu, nia hatutan, MEJD sei konsulta Komisaun Funsaun Públika nune’e bele haree ninia prosedimentu legal.