Estadu Brazíl aplika ona pena prizaun preventiva no hapara kautelarmente estabelesimentu sira hanesan, BFR ne’ebé lokaliza iha Mineiro, Peccin Agro Industriál iha Ceritiba, Peccin Agro Industriál iha Sarago Súl.
Estadu Brazíl nu’udar nasaun esportadór na’an oioin ba nasaun kolia lian portugés (CPLP) no rejiaun Ázia, inklui Timor-Leste.
Kazu na’an kontaminadu ne’e konsege halo Brazíl ‘sente arraska’ tanba mundu tomak preokupa ho na’an ne’ebé adulteradu ka labele atu konsumu.
Tanba ne’e Estadu Brazíl liu husi Prezidente halo ona investigasaun ba kazu ne’e no aplika pena prizaun preventiva ba kompañia sira.
Xefe Diresaun Operasaun, Alfausius Costa Akqut hateten, Autoridade Inspesaun Fiskalzasaun Atividade Ekonomia Sanitária Alimentár (AIFESA) foti ona medida balun hanesan ezekutivu imediatu asaun preventiva, liu husi inspesaun emerjénsia ho Ministériu Saúde hodi submete ba analiza laboratóriu.
Problema na’an liu prazu iha Brazíl ne’e halo Governu Timor-Leste mós preokupa, tanba durante ne’e emprezáriu barak sosa na’an manu importasaun Brazíl nian husi Singapura mai TL.
Ho problema ne’e, Governu Timor-Leste halo ona komunikasaun ho Embaixada Brazíl iha Timor-Leste hodi akompaña direta investigasaun ba kazu no husu atu manu liu prazu labele importa mai TL.
“Naan importasaun husi Brazíl ne’ebé deskonfia kontaminadu ho substánsia kímika no mikrobiolojia”, dehan Alfausius, iha nia knaar fatin Matadouru, Sesta (21/4).
Nia informa, hahán sira hanesan na’an manu importasaun ho marka Langguiro-Brazíl (1400 grama), Sadia-Brazíl (800 grama- 1.000 grama) no Perdigão-Brazíl (900 grama), Naan kulat ho marka Flambola-Brazíl, Sosis Borrila (340 grama).
Na’an sira ne’e rekolla iha estabelesimentu kompañia importador sira hanesan Lita Store, Happy Market, Leader Supermarket, Kmanek Supermarket no Centro Supermarket.
Produtu hirak ne’e tuir rezultadu analiza laboratóriu nasionál saúde hatudu rezultadu katak produtu livre husi kontaminasaun kímika.
Alfausius hatutan, atu garante situasaun kontrola husi konsumidór, Ministériu Agrikultura Pekuária Abastesimentu (MAP) mós kria ona ekipa auditoria atu halo apuramentu ka ezamina irregularidade iha estabelesimentu18 ne’ebé konsinte iha opresaun na’an manu.
Nune’e, husi fiskalizasaun ne’ebé hala’o mós koleta na’an amostra nian hodi haruka ba rede ofisial laboratóriu MAP nian hodi fó atensaun ba produtu ne’ebé konstitui iha investigasaun.
Husi parte Estadu TL, orienta ba AIFESA hodi konsidera katak informasaun sira ne’ebé temi ona hanesan dalan importante atu bele garante seriedade husi Estadu Brazíl, haree kona-ba fenomentu naan manu hodi kontinua mantein transparénsia mundiál ba Estadu hotu ne’ebé nia konsumidór afetadu ho fenómenu ne’e rasik.
