Ministru Turizmu Komersiu no Indústria, Jóse Lucas do Carmo hateten, liña ministériu sei halo diskusaun ho agrikultór sira kona ba rejultadu produsaun iha rai laran
"Agora dadaun ita halo levantamentu dadus, atu nune’e bele hatene mapamentu kona ba produtu lokal sira," dehan Jóse Lucas do Carmo ba jornalista sira hafoin remata reuniaun Konsellu Ministru, ( 16/02 )
Nia haktuir, dekretu lei ne’e hetan ona aprovasaun husi Konsellu Ministru iha semana kotuk no lori ona ba Prezidente Repúblika, ne’e duni bainhra hetan ona promulgasaun hafoin bele implementa.
"Kuandu dekretu lei ne'e hetan ona promulga, ita bele avansa maibé nia implementasaun la hanesan, tanba iha faze daruak ne’e sei distribui ba sira ne’ebé maka prezia liu," tenik nia.
Nia klarifika, implementasaun sesta bázika daruak la hanesan ho tinan kotuk, tanba bazeia ba dekretu lei ne'ebé Konsellu Ministru aprova, funsionariu ho saláriu liu $ 500 la bele asesu.
Antes ne’e, Organizasaun Luta hamutuk ( LH ) konsidera politika governu hodi implementa programa sesta bazika hamosu fallansu, tanba ne’e nia parte rekomenda ba governu, bainhira atu implementa fali sesta bazika ba daruak di’ak liu fahe osan de’it ba povu.
Diretór Luta Hamutuk, José Alves da Costa hateten, programa sesta bázika laiha benefisiu, maibé governu hakarak kontinua implementa ba etapa daruak nian.
"Se ita nia osan bara,k entaun fahe de'it ba kada uma kain, tamba osan $50 bele ba de'it nia (povu), nune’e nia bele hola rasik saida maka tuir ninia hakarak, tanba sesta bazika ne’e faille, ferik-katuas sira ne’ebé nehan at ona mós laiha simu hotu batar," dehan José Alves da Costa ba jornál INDEPENDENTE iha nia knaar fatin Palapasu, foin lalais.
Nia haktuir, programa sesta bazika ne’e di'ak liu hapara ona, tamba laiha benefisiu ba povu no agrikultór sira ne'ebé halo produsaun. "Ita asiste iha fatin-fatin, supermie, manu tolun, fós, masin midar no sasan sira seluk maioria importa husi rai liur. Ne’e duni, politika sesta bázika ne'e faille, tanba programa ne’e fó benefisiu ba grupu balun de'it no la’os agrikultór sira," tenik nia.
Nia klarifika, iha tinan kotuk bainhira hahú implementasaun programa sesta bazika, maibé seidauk to'o rohan produsaun rai laran menus ona, entaun hein fila-fali sasan importasaun husi rai liur.
Sesta bazika la’os ohin ko'alia aban implementa, maibé to'o tinan maka foin implementa no governu ladun tau importansia ba agrikultór sira, entaun osan sei sai hotu ba liur.
Nune’e mós, Ministru Prezidensia Konselu Ministru (MPKM), Fidelis Manuel Leite Magalhães hateten, Dekretu Lei ida ne’ebé maka introdus alterasaun sira ba medida reforsu distribuisaun sesta bazika ba familia ne’ebé presiza liu apoia intervensaun governu nian.
“Ho projetu Dekretu-Lei ne’e, Governu hakarak kontinua fó produtu nesesidade dahuluk nian, ba, iha sorin seluk, atu garante sustentabilidade família sira nian, no iha tempu hanesan atu kria kondisaun normalidade ba atividade produtór no operadór ekonómiku nasionál sira nian tanba prokura menus,” dehan nia, hafoin reuniaun Konselu Ministru iha Palasiu Governu, foin lalais.
Nia jaktuir, sesta bázika ne’e fiksa ho valór másimu $50 ba membru ida-idak iha uma-kain benefisiáriu no sei distribui durante tinan 2022. Sesta bázika ne’e kompostu husi produtu ai-han no sasan ijiene pesoál, hanesan deskrisaun, kuantidade no folin sei define liu husi despaxu konjuntu membru Governu sira ne’ebé responsavel iha área komérsiu no indústria no kooperativa sira.
Medida Sesta Bázika ne’e limite ba ema sira ne’ebé presiza liu apoia ai-han, hanesan hakerek ona iha “Livru Rejistu Uma Kain nian.” Ba sidadaun sira ne’ebé ho titulár órgaun soberania no titulár kargu Diresaun ka Xefe Departamentu sira husi servisu Administrasaun Públika direta ka indireta estadu nian la inklui iha lista benefisiáriu nian.
