Vise Primeira Ministra no Ministra Solidariedade Sosial no Inkluzaun, Armanda Berta dos Santos informa, nia parte hasoru-malu ho Primeiru Ministru Taur Matan Ruak hodi relata kona-ba pagamentu ba subsidiu $200 ne’ebé finaliza ona iha 6 Janeiru 2023.

Tuir dadus ne’ebé MSSI iha, nia hatutan, iha uma-kain rihun 28 resin ne’ebé reklama tanba sira-nia naran laiha iha lista pagamentu subsidiu $200.

"Iha dekretu lei ne'e laiha reklamante, ne'ebé ko'alia ona ho Primeiru Ministru oinsa par atu bele haree fali ida ne'e, atu rezolve fali ba sira ne'ebé reklamante, se iha dalan atu rezolve ita bele halo, se laiha, ita pasiensia," dehan nia hafoin hasoru PM Taur, iha Palásiu Governu, Tersa (10/01).

Iha fatin hanesan, Vise Ministru Administrasaun Estatal (MAE) Lino Torexão de Jesus hatete, MSSI no MAE simu ona reklamasaun ba subsidiu $200, tan ne’e sira-nia parte sei haree oinsa atu rezolve reklamasaun hirak ne’e.

"Iha lei la hatete dehan bele reklama, maibé ne'e ema-nia direitu, ita haree didi'ak oinsá mak atu bele rejista hodi bele simu, maibé totál seidauk hatene loos tanba balun foin tama, balun ami haruka ba ona," nia dehan.