Minístra Verónica das Dores hatete, asina akordu ho Institutu Seguransa Sosial (ISS) tanba reprezenta ministériu nia liman-ain, hodi tau matan ba vulneáavel sira hanesan, feto faluk, oan-ki’ak no defisiénsia sira.
“Atu tau matan ba ita-nia vitima sira ne’ebé hanesan, feto faluk, oan-ki’ak, sira ne’ebé difisiénsia, ferik-katuas, no violénsia bazeia ba jéneru ne’ebé iha ita-nia nasaun, entaun instituisaun sira ne’e maka hodi tau matan ba sira,” dehan Ministra iha salaun enkontru MSSI Kaikoli, Tersa (18/06).
Kona-ba asina akordu ho parseria ne’e, nia dehan, asina ona akordu ho ministériu hamutuk 30 no ajensia rua seluk iha hela prosesu avaliasaun.
“Ohin iha ajénsia 32 mak marka prezensa iha ne’e, husi totál ne’e ezeptu ajénsia 2 mak sei iha prosesu nia laran, ne’ebé sira ohin asina akordu ne’e hamutuk ajénsia 30,” nia hatutan.
Ministra hatutan, MSSI apoiu ba ajénsia sira, tanba iha problema balun maka, vítima abandonadu tiha, labarik orfonatu sira, no família sira ne’ebé vulnerável tebes, entaun presiza MSSI nia ajuda.
Irmãn husi Orfonatu São Domingos Sávio Venilale, Auria Maria Marçal, hato'o agradese ba governu liu husi MSSI ne’ebé tulun no suporta ona sira-nia misaun durante ne’e.
Nia dehan, husi fundus ne’ebé iha akordu ne'e, sei uza ba labarik sira nia nesesidade bázika, saúde no edukasaun nian.
“Akordu ohin nian hamutuk ho Ministériu Solidariedade Sosiál liu husi orsamentu ne’ebé ami simu orsamentu hamutuk 43 mil e tál atu uza ba labarik sira nia nesesidade no mos sira-nia presiza iha orfonatu São Domigos Sávio mak hanesan ai-han, ai-moruk ho materiál eskolar sira ijiene no buat seluk ne’ebé labarik sira presiza,” dehan Irman.
Enkuantu, orsamentu ne'ebé MSSI aloka ba programa subvensaun públika ba tinan fiskál 2024 hamutuk dollar Amerikanu tokon ida resin.