Minístra Verónica das Dores hatete, Programa Bolsa da Mãe (BdM) Kondisionál nu’udar programa governu kontinua implementa komesa husi 2008, bazeia ba Dekreitu Lei númeru 18/2012, de 4 de Abríl.
Dekretu Lei ba BdM Kondisionál, nia dehan, hetan ona alterasaun iha Janeiru 2024, hodi halo mudansa ba montante orsamentu ba benefisiáriu sira, liuhusi Dekreitu Lei númeru 1/2024, 3 de Janeiro, iha artigu 10 no 11 ne’ebé deskreve mudansa ba montante orsamentu no akresenta liután kondisionalidade eskola ba benefisiáriu sira.
Nune’e, mudansa ne’e montante orsamentu hanesan, ensinu primária $8.00, ensinu pre-sekundária $9.00, ensinu sekundáriu $10.00, labarik ho defisiénsia sei hetan tan adisionál $5.00.
“Ohin, 18 de Juñu 2024, MSSI sei aprova lista benefisiáriu elejível ba pagamentu faze primeiru, kona-ba prosesu hotu relasiona ho pagamentu Bolsa da Mãe Kondisional tinan 2024,” dehan Ministra iha Salaun Enkontru MSSI Kaikoli, Tersa (18/06).
Governante ne’e esplika, bazeia ba tetu orsamentu 2024, MSSI aloka ba Bolsa da Mãe Kondisional totál $ 6,642,777, maibé totál benefisiariu elejível iha tinan 2024 husi munisípiu hotu hamutuk 69,571 tan ne’e MSSI presiza montante orsamentu $ 7,066,596, atu halo pagamentu ba sira.
Tuir dadus husi MSSI, eskola primária totál benefisiáriu 43,211, ho total orsamentu $4,148,256, pre-sekundáriu 20,405, orsamentu $ 2,203,740, no sekundáriu benifisiáriu 5,955, orsamentu $ 714,600.
“Ho tetu orsamentu ne’ebe MSSI iha ba 2024, signifika MSSI sei presiza tan Orsamentu $423,819 hodi kobre hotu benefisiáriu ne’ebé identifika ona ba 2024,” dehan Ministra.
Tuir kalendáriu ne’ebé fó sai, MSSI sei halo pagamentu faze dahuluk iha tinan 2024, ne’ebé hahú iha fulan-Julhu ba benefisiáriu hamutuk 59,813.
Benefisáriu hirak ne’e la inklui Munisípiu Díli no Vikeke, maibé sei tama iha pagamentu faze segundu, depois fulan-Julhu 2024.