Deputadu bankada PD, Maria Teresa Gusmão hatete, tuir dadaus molok Covid-19, kapasidade kompra 1.3%, maibé hafoin Covid kapasidade kompra sa’e maka’as to’o 12%.

"Sujere, se bele altera fali lei salariu minimu ou analiza hodi halo fali alterasaun ba lei salariu minimu par sai baze forte hodi fó justisa ba trabalador sira, tanba sasan karun ba beibeik entaun iha obrigasaun no iha nesesidade atu hasa’e salariu funsinariu publiku no traballador sira," dehan deputada Maria, iha PN, Tersa (18/06).

Aleinde kapasidade atu sosa sasan tanba salariu ne’ebé kiik, nia dehan, iha mós loza balun ne’ebé halo esplorasaun ba trabaladór sira.

Ezemplu, nia dehan, iha loza balun no kompaña boot balun, salariu husi trabaladór ne’ebé servisu ona durante tinan mak $115 ka $120.

“Servisu over time la selu no trata tabaladór sira la ho dignu,” dehan nia.

Ba kestaun ne’e, Vise Ministru Asuntu Parlamentar, Aderito Hugo da Costa promete atu hato’o kestaun ne’e ba SEFOPE hodi bele aprezenta ona alterasaun lei salariu minimu ba Konsellu Ministru.

Vise Ministru ne’e mós konsidera SEFOPE mós presiza atu tau-matan di’ak liu tan ba implementasaun salariu minimu $115 iha loza no kompaña sira.

“Kompaña sira tenke hatene regras. Ezemplu, salariu baziku mak $115 maibé ninia servisu hanesan saida mak hetan ida $115 ne'e. Se nia skill elevadu, entaun nia labele hetan $115 mais tenke sa'e, no mós ninia diretu ba over time ne'e, se la'e ne'e violasaun grave, entaun SEPFOPE mós tenke hare'e situasaun ida ne'e,” deklara Hugo.