Objetivu husi harii sentru refere atu halo atendimentu integradu ba komunidade sira ne’ebé iha situasaun frazilidade, liu-liu ema ho defisiênsia, labarik no feto sira ne’ebé hasoru violénsia domestika no violénsia bazeia ba jéneru, labarik no jovens ne’eb’e moris iha situasaun vulnerabilidade nia laran.
Ministra MSSI Armanda Berta do Santos hatete, sentru ne’e atu fó oportunidade no atendimentu ho infraestrutura modernu, ne'ebé kualidade ho nia ekipamentu kompletu nomós iha jestaun ne’ebé mak di’ak.
"Ita persija rekursu umanus ne’ebé kualifikadu no Portugal prontu simu ka fornese ita nia ema sira ba tuir treinamentu ho formasaun espesial iha ne’eba no depois sentru ne’e hari’i no kontrusaun remata ita bele iha ona rekursu atu haree sentru ida ne’e," dehan Komunikandu ne'ebé Online INDEPENDENTE sita.
Governante ne'e esplika, rai ne'ebé atu hari Sentru integradu hamutuk hektares haat ne'ebé oferese husi komunidade ho Ministeriu justisa.
Tanba ne'e husu ba autoriedade lokal no komunidade Munisipiu Ainaru ne'ebé hakarak dezemvolvimentu di'ak tenki asegura atu nune'e projetu ne'e bele lao di'ak.
"Husu ba autoridade lokal sira liu-liu Ainaro oan ita hakarak dezenvolvimentu iha ita nia munisípiu, ita rasik mak sai asegura ba ida ne’e atu nune’e projetu ne’e bele lao ho di’ak, se karik hahu tau matan hela ba fatin ida ne’e no tinan ida ne’e sei halo estudu viabilidade no ba tinan oin tau orsamentu hodi bele halo ona,” Dehan Vise-Primeira Ministra.
Nune'e mos, Vise-Ministra hato'o agradese wain ba Governu Portugal tanba fó ona apoiu hodi bele realiza eventu ne'e no fó mos agradese ba autoriedade lokal Munisipiu Ainaru ne'ebé kontribui makas ba iha eventu ne'e.
Iha fatin hanesan, Embaixadora Portugal iha Timor-Leste, Maria Manuela Freitas Bairos hatete, agredese teb-tebes ba komunidade Ainaro ho vontade di’ak hodi oferese fatin hodi bele hari sentru ida atu tau matan ba vulneravel sira ne’ebé mak kbi’it laek.
Ministra MSSI ba Portugal iha biban bele ba visita sentru balun ne’ebé mak tau matan ba ema kbi’it laek sira no nia tenta ho vontade tomak hamutuk ho Vise-Ministra MSSI hakarak hari’i mós modelu ekipamentu ida iha Timor-Leste, Apresia tebes tanbahakarak hatudu vontade no luta hodi redus ema kbi’it laek ninia nesesidades.
Iha biban ne'e mos, Administradór Munisípiu Ainaro, Leovigildo Amaral Pereira hato’o, agradese ba Governu Timor-Leste liu husi Vise-Primeira Ministra no Ministra MSSI no Governu Portugal liu husi Embaixadora Portugal servisu hamutuk hodi hari’i sentru atendimentu integradu ne’e.
"Hau hanesan Administradór Munisípiu Ainaro orguilo teb-tebes programa ida ne’e ba futuru bele akumula ita nia ema sira ne’e hanesan defisiênsia no kbi’it laek nomós agradese ba Suku Ainaro nia tanba bele oferese rai ida ne’ebe luan teb-tebes atu hari’i sentru ida ne’e," tenik nia.
Administrador hatete, Sentru ne’e di’ak tebes ba Munisípiu Ainaro inklui mós munisípiu seluk karik sira nia ema ruma mai atu hela iha sentru ne’e ho kontente teb-tebes.
Depois lansamentu, Vise-Primeira Ministra no Ministra MSSI ho Vise-Ministra MSSI akompaña husi Embaixadora Portugal no Administradór Munisípiu Ainaro entrega apoiu humanitaria aihan ba komunidade vulneravél ne’ebé mak identifikadu hanesan Inan Faluk, Idosos no Defisiênsia iha suku ka postu Administrativu Ainaro Vila.
