Enkuantu, munisipiu sira ne’ebé akontese dezastre naturais mak hanesan, iha Munisiupiu Ermera, Baukau, Bobonaro, Manufahi no Rejiaun Administrativa Espesial Oekussi Ambeno (RAEOA).

Diretór Gabineti Relasaun Externa no Komunikasaun Anacleto Caitano hatete, uma sira ne'ebé hetan estragus husi Dezastre Naturais ho tipo mak rai halai estragus uma rua, inundasaun hetan estragus uma 16, anin boot sobu uma hitu (7), ahi han uma ida (1).

No akontese udan boot iha Munisipiu Bobonaru rezulta mota lori ema na’in tolu to'o lakon vida, husi ema na’in tolu ne'e, na’in rua hetan ona no na’in ida seidauk.

Nia esplika, iha Postu Bobonaro, Suku Lour Aldeia Galitaz, iha loron 27/03/2023 akontese udan no mota bo'ot lori inan ferik ida ho naran Milena de Jesus (65) iha mota Lomea, bainhira fila husi to'os, familias matebian hetan fali iha loron 28 Marsu 2023.

Ho nune’e, iha Suku Lourba, Aldeia Sordoli Iha loron 01/04/2023 akontese udan no mota bo'ot, lori vitima nain 2 ho naran Tasia da Costa, idade 10 anos, ho Adriana da Costa idade 12 anos.

"Husi vitima na’in rua (2) ne’e, na’in ida mak hetan ona nia isin mate ho naran Tasia da Costa, vitima ho naran Adriana da Costa até agora buka seidauk hetan. Kronologia ba akontesemento ne’e bainhira vitima hamutuk ho nia kolega na’in ualu (8) atu ba buka ramus hodi komemora loron Domingo Ramus mak hodi hetan dezastres,”dehan nia iha Salaun APC, Kaikoli, segunda (03/04).

Diretór haktuir, APC seidauk halo hela reverifikasaun no apoiu emerjensia ba vítima sira husi munisipiu Baukau, Bobonaro, Manufahi no RAEOA.

Entretantu, iha munisipiu Ermera, APC halo ona verifikasaun ba vítima  balun hodi fó ona apoiu emerjensia no balun mak seidauk.

"Kuaze komunidade sira husi munisipiu hirak ne'ebé afeita ba dezastre ne'e seidauk hetan apoiu emerjensia tanba iha prosesu reverifikasaun no balun akontese liu iha área rurais entaun seidauk bele hetan apoiu," katak nia.

Tanba ne’e, APC nafatin apela ba komunidade sira hotu atu kuidadu an iha tempo udan no anin boot.