Minístra Solidariedade Sosiál no Inkluzaun, Verónica das Dores hatete, objetivu husi apoiu ai-han ba pasiente ne’e atu hasa’e sira-nia nutrisaun, atu rekopera lalais husi sira-nia saúde.
"Atu hatete de'it ohin ami-na’in rua mai tanba iha objetivu ida, atu apoiu ai-han ba maluk sira ne'ebé afeita moras Lepra, tanba moras Lepra uluk kedas iha. Entaun objetivu husi apoiu ai-han ba maluk afetadu ba moras lepra ne'e atu hasa'e sira-nia nutrisaun, atu nune'e bele rekopera fila-fali sira nia saúde," dehan Minístra Verónica da Dores liu husi komunikandu ne’ebé online INDEPENDENTE asesu iha Kuarta (26/06)
Kona-ba kondisaun saúde nian, Minístra dehan, pasiente sira ne’e hetan hotu ona tratamentu, maibé presiza nutrisaun, ne’e mak MSSI sei kontinua apoia nafatin ai-hán ba sira.
Minístra Saúde (MS) Élia dos Reis Amaral haktuir, moras Lepra ne'e mai husi mikro bakteria ne'ebé afeita ba kulit, entaun moras ne'e bele halo liman, ain, no ibun sira sai difisiénsia tiha.
"Ha'u husu ba inan ho aman sira hakbesik aan ba fasilidade saúde ne'ebé besik, hodi halo tratamentu, depois husu nafatin ba família no viziñu sira keta deskrimina ba ita-nia maluk sira ne'ebé maka afeta moras lepra," dehan Ministra Élia.
Sekretáriu Asuntu Sosiál Munisípiu Manatuto Natalino M. Carvalho informa, lori autoridade nia naran hato'o agradese baMSSI no MS tanba bele fó tempu hodi haree direitamente maluk difisiénsia Lepra sira ne'e.
"Ha'u hato'o agradese ba Ministra Sosiál ho Ministra Saúde nia prezensa hodi haree diretamente ami maluk difisiénsia sira ne'ebé afeta ba moras Lepra iha Munisípiu Manatuto," dehan nia.
Afeitadu Lepra iha Timor-Leste durante ne’e, Asosiasaun Transforma Lepra iha Timor -Leste (ATLETIL) identifika totál pasiente Lepra husui Munisípiu Manatuto hamutuk 160.