Prezidente KSTL, Almerio Vila Nova hateten, to’o ohin loron governu seidauk solusiona problema kona ba folin fos, ida ne'e bele fo impaktu ba traballadór sira ne'ebé ho salariu $1.15.

“Governu tenke buka solusiona problema ida ne’e, tanba maioria povu nia rendimentu ekonomia ki’ikoan tebes, entaun susar atu hadia traballador sira nia moris loro-loron nian,” informa Almerio Vila Nova ba Jornalista INDEPENDENTE iha knaar fatin, Bemori, (24/06).

Nia haktuir, relasiona ho kestaun ne’e governu presiza hasae kresimentu ekonomia iha rai laran, liu husi hasa'e salariu minimu ba traballadór hodi nune’e bele responde nesesidade uma laran.

“Dahuluk governu estabelese sasan iha merkadu atu nune'e sasan nia folin la bele aumenta, ho objetivu atu fo poder kompras ne'e ba traballador sira,” tenik nia.

Nia argumenta, governu tenke fo protesaun ba traballador sira ne'ebe agora dadaun manan ho investimentu kiik, no fo protesaun liu husi sae salariu minimu.

Aleinde ne'e atu besik tinan ida nia laran ona hare'e fos nia folin nunka tun no nafatin presu aumenta, tanbá ne'e traballador sira ho salariu minimu$1.15 dolar ne'e la sufisiente atu hola nesesidade uma laran nia.