Vise-Ministra Solidadariedade Sosial no Inkluzaun Signi Candrawati Verdial hatete, MSSI aprezenta ona relatoriu ba planu no atividade sira ne’ebé MSSI hala’o ona hahú tinan 2021 to’o 2022.
“Hahú husi 2021 to'o ohin loron (2023), MSSI konsege rekolla ona dadus Vulneravel hamutuk rihun 34 mak eziste iha teritoriu laran tomak,”dehan nia iha Salaun MSSI, Kaikoli, sesta (02/06).
Governante ne’e hatutan, husi dadus vulneravel ne'ebé lansa ona kompostu husi idozus, ema ho difisiensia, feto ho labarik no grupo abandonadu sira.
Nia dehan, dadus ema ho vulneravél kada tinan sempre atualiza tanba tinan tuir mai bele mosu tan ema ruma ne'ebé mai ho problema sosial oin seluk.
"Agora dadus ne'ebé ita rekolla ne'e ezatamente kruza ho estratejia ne'e rasik katak, programa no atividade sira ne'ebé ita tau ona ne'e kruza tebes ho dadus ne'ebé ita rekolla, ema maioria barak liu ke ho problema sosial, barak monu ba iha risku vulneravel boot mak, idozus sira, difisensia, feto ho labarik sira no grupo abandonadu sira balun," dehan nia.
Entretantu, Vise MSSI akresenta, husi dadus vulneravel ne’ebé iha, hatudu katak, ema hirak ne'e mak presiza duni governu tau atensaun makas, liu husi apoiu subsidiu idozus no invalides, bolsa da mãe, apoiu ba vitíma bazeia ba Jéneru no iha mós apoiu kiik ba ema sira ne'ebé hetan dezastre.
