Tuir komunikadu ne'ebé Online INDEPENDENTE sita katak, ezekusaun reál OJE 2023 iha fulan daruak, trimestre daruak ba Administrasaun Sentrál em termos nominál atinji ona millaun $425,8 husi totál orsamentu alokadu biliaun $1,8.
Enkuantu, Autoridade RAEOA-ZEESM ezekuta ona millaun $12 husi orsamentu alokadu millaun $120.
Iha ezekusaun OJE 2023 iha Administrasaun Sentrál aas liu mak iha Liñas Ministeriais ne’ebé ezekuta ona millaun $320,7 husi orsamentu alokadu biliaun $1,2.
Nunue'e, tuir kedan ho Ajénsia Autónomas ho nia ezekusaun atinji ona millaun $59,8 husi orsamentu alokadu millaun $218,3 no autoridade Munisipais ezekuta ona millaun $33 husi orsamentu alokadu millaun $81,3.
Entretantu, Fundu Infraestrutura (FI) ezekuta ona millaun $6,3 husi orsamentu alokadu millaun $202,7, Fundu Dezenvolvimentu Kapitál Umanu ezekuta ona millaun $3,6 husi orsamentu alokadu millaun $17,8.
Enkuantu, Fundu Covid-19 ezekuta ona millaun $1,7 husi orsamentu alokadu millaun $18.
To’o iha inísiu segundu trimestre 2023, Ministériu Finansas (MF) halo ona levantamentu osan husi Fundu Minarai ho montante millaun $490 husi totál orsamentu biliaun $1,3 ne’ebé mak Parlamentu Nasionál aprova ona liuhusi Lei OJE 2023.
