Nasaun lima ne’ebé aseita ona pasaporte ho karimbu prorrogasaun mak; Estadus Unidus Amerika, Indonezia, Brazil, Nova Zelandia no Malazia.
Aleinde nasaun lima ne’e, iha posibilidade boot atu nasaun tolu tan, Australia, Singapura no Koreia Sul, mak sei hato’o sira-nia aseitasaun ba pasaporte ho karimbu prorrogasaun.
"Hotu-hotu aseita hotu ona, horisehik simu husi Estadus Unidus Amerika konfirma ita bele uza karimbu prorrogasaun pasaporte. Indonézia nian komesa sidadaun sira ba ona no mós Malazia mós ema komesa ba ona, hein tan semana ne'e ho semana oin Austrália no Singapura ho Koreia,” informa Tiago hafoin partisipa iha reuniaun Konsellu Ministru, iha palasiu governu, Kuarta (31/05).
Ministru ne’e informa mós katak, pasaporte hirak ne’ebé autoriza hodi tau karimbu prorrogasaun mak pasaporte elektroniku ne’ebé produs husi tinan 2017 mai leten, enkuantu ba pasaporte ne’ebé produs husi tinan 2017 ba kraik la autoriza.
Entretantu, iha 29 Marsu liu ba, Konsellu Ministru aprova dekretu lei ba prorrogasaun estraordinária ba prazu validade pasaporte eletróniku Timor Leste.
"Aprova ona mós Dekretu Lei ne'ebé aprezenta husi Ministeriu Justisa ho hakarak halo prorrogasaun estraordinriu ba prazu validade pasaporte eletroniku Timor Leste, tanba ne'e konsellu Ministru deside atu prorroga pasaporte ne'ebé kaduka durante periodu ne'ebé tama iha vigór to'o tinan 2024," informa Ministru Koordenador Assuntu Ekonómiku, Joaquim Amaral, iha altura ne’ebá.
