Tuir Vise Ministra MSSI, Signi Chandrawati Verdial, hateten, planu asaun refere ba tinan 10 nian, hahú husi tinan 2021 to'o 2030, ho nune'e kada ministeriu bele haree asunto ne’ebé liga ba ema ho defisiensia nia atividade sira.

Governante ne’e hatutan, iha fulan abríl liu ba Parlamentu Nasional (PN) ratifika ona konvensaun ba ema ho defisiensia, ho nune'e parte tekniku husi MSSI nian, hahú halo ona servisu hodi responde ba ema ho defisiensia nia atividade.

“Agora ita atu reforsa liu tan, liu-liu hare ba parte sira ne'ebé seidauk implementa ho di'ak, ita reforsa liu tan, entaun ida ne'e marka pasu importante ida oinsá ita atu mellora liu tan ita nia servisu, liu-liu ita atu asegura katak, ita labele husik ema ida iha kotuk,”dehan nia iha Timor Plaza, kinta ne’e (11/08).

Nia informa, servisu koordenasaun entre liña ministerial sira, kada tinan implementa ona atividade lubuk ida, liga ho programa ba ema ho defisiensia sira.

“Tanba ne'e mak, ohin parte tekniku sira halo diskusaun atu asegura katak buat sira ne’ebé tau iha planu asaun nasionál ba ema ho defisiensia, kada liña ministerial sira tenki foti hodi integra ba planu anual,”dehan nia.

Nia dehan, sei iha mós aprezentasaun ba progressu servisu hahú husi janeiru to'o jullu tinan 2022, kona-ba programa ne'ebé liga ba ema ho defisiensia no sei prepara programa ba futuru.

Ho nune'e, liña ministerial sira sei diskute planu anual ba tinan 2023 durante semana rua ka tolu hodi kria programa no aloka osamentu ba ema ho defisiensia.

"Ita mós agora daudauk diskute hela planu 2023, entaun ho momentu ida ne'ebé di'ak ita atu fo hanoin fali ba liña ministerial sira hotu katak, iha tempu ita halo ita nia planeamentu hodi aloka orsamentu, ne'ebé tempu ida agora ne'e ita tenki hanoin mós atividade no programa ba ema ho defisiensia sira,"tenik nia.

Iha fatin hanesan, Diretór Nasional ba Asuntu Direitu Ema ho Defisiensia, hanesan mós Sekretariu ba PAN, iha MSSI, Mateus da Silva, hatete, progresu ba implementasaun planu refere seidauk la’o ho diak tanba iha limitasaun no mós falta rekursu humanu liu-liu orsamentu ne’ebé la sufisiente atu tau iha planu asaun nasional.

“Hanesan sekretáriadu ba planu refere ita kontinua servisu hamutuk nafatin ho liña ministeriais sira para atu fanun nafatin sira,”dehan nia.

Nia informa, sekretariadu iha papel atu rekolla dadus iha embaixador no liña ministerial sira ba iha implementasaun PAN kada trimestral.

"Kuandu bainhira iha indikador balun ne'ebé seidauk atinji, ita sei buka tuir tanba saida mak ida ne'e la funsiona, i depois sira nia problema ne'ebé sira infrenta ne'e mak ida ne'ebé? para sekretáriadu apoiu sira para atu halo servisu ne'e di'ak liu tan,"tenik nia.

Entretantu, iha enkontru trimestral daruak ba PAN ne’e, Vise Ministra MSSI fahe mós sertifikadu apresiasaun ba embaixadores asuntu defisiensia husi liña ministeriais sira no organizasaun bae ma ho defisiensia ne’ebé

durante ne’e dezenvolve PAN EhD.

Enkuantu, tuir dadus total ema ho defisiensia iha Timor-Leste hamutuk rihun 38.118.