Diretór Jeral Politika Planu Inkluzaun iha Ministeriu Edukasaun Joventude no Desportu, Raimundo José Neto, hatete, konstrusaun ba eskola sira iha territoriu nasionál, tuir tarjetu husi Ministeriu Edukasaun Joventude no Desportu sei konklui iha tinan ne'e, maibé konstrusaun tarde, tanba iha failansu balun.
“Konstrusaun eskola sira nia progresu tuir relatoriu ne'ebé ha'u simu eskola balun rata-rata foin mak to'o 50%, tanba iha failansu balun, tuir lolos iha fulan ne'e tenke hotu, maibé balun lansamentu iha fulan marsu no abril, entaun konstrusaun ba eskola sira foin mak atinji 50%," dehan nia ba Online INDEPENDENTE, iha Ótel City8 Manleuana, kinta ne’e (11/08).
Nia dehan, konstrusaun eskola sira balun seidauk maximu, tanba iha manual balun iha ninia rekejistus ne'ebé dependente ba instituisaun balun hanesan, Ministeriu Obras Publika (MOP) no ADN.
"Tanba ne'e mak prosesu limitasaun ba MOP atu ba haree, tanba iha parte ida, enjeneiru husi obras publika nian tenke ba haree kontrusaun refere, hodi aprova mak foin bele hada batako, no hare ekipamentus sira ba konstrusaun nian, ho buat sira ne'e demora,"dehan nia.
Nia fundamenta, servisu husi parte MOP nian limitadu tebes tanba sira laos haree de'it edukasaun nian, maibé haree mós ba iha infrastrutura sira no haree ministeriu sira seluk nia obra, ho nune'e mak konstrusaun eskola sira tarde.
“Ho nune'e, ami tenta atu hadia failansu sira ne'e liu-liu hadia manual ba implementasaun ne'e,”haktuir nia.
Nia Esplika, tuir planu MEJD nian liu husi projetu komunitaria sei konstrui no rehabilita eskola sira hamutuk 120 iha teritoriu nasional.
"Projetu komunitaria ne'e hamutuk 120, maibé ha'u ladun hatene kada munisipiu sira hetan hira, maibé boot liu mak iha munisipiu Baukau 29 eskola, munisipiu sira seluk balun iha 20, balun iha 18 no balun 12," nia relata.
Ho nune’e, Diretór ne’e akresenta, ba konstrusaun eskola sira, MEJD aloka orsamentu hamutuk tokon U$6.
Iha fatin hanesan, Diretór Edukasaun Munisipiu Dili, Carlito da Silva, informa, kontrusaun eskola iha munisipiu Dili la'o normal, balun atinji ona 50% no balun foin atinji 40%.
"Projetu konstrusaun ne'ebé lao iha eskola iha sira iha territoriu nasionál liu-liu ba iha munisipiu Dili la'o normal, so iha problema ida deit mak iha eskola 12 novembru, maibé ami koordena ona no ba cek haruka eksevator sira ke no hasai tiha ai-abut sira, tanba ne'e ida ikus liu mak tarde ne'e eskola 12 novembru ona," nia dehan.
Tuir nia, konstrusaun ba eskola foun iha munisipiu Dili hamutuk 8 no eskola ne’ebé halo deit rehabilitasaun hanesan hadia sala de aula no mós sira seluk iha 8.
