Enkuantu, atleta na’in tolu ne’e mak, Elfiana dos Santos hetan títulu Women Candidate Master (WCM) ho pontu 4, Sonizia Tilman da Silva hetan mós títulu nu'udar Women Candidate Master (WCM) ho pontu 5 no atelta Helder de Araújo hetan títulu direta nuudar FIDE Master (FM) ho pontu 7.5.
Tuir komunikadu ne’ebé Online INDEPENDENTE, asesu iha pajina ofisial Federasaun Xadrez Timor-Leste (FXTL), katak atleta Elfiana dos Santos, kontribui ba vitoria iha jogu ikus hodi halakon atleta sira seluk ne'ebé la konsege hetan vitoria.
Ho nune’e, iha jogu ikus ba ekipa mane no feto Timor-Leste, iha Olimpiade Xadrez Mundiál, atleta Elfiana dos Santos vense ninia oponente maske atleta sira seluk la konsege kontribui vitória no atleta timoroan na'in tolu hetan títulu direita husi FIDE.
Tanba ne’e, iha jogu ronda ikus nian ne'e, atleta Elfiana dos Santos hamate liurai husi oponente ho Naran Chika Pride husi Nasaun Bahamas durante kuaze oras tolu nia laran.
"Ho manán iha ronda ikus nian ne'e, atleta Elfiana dos Santos gaña totál pontu individual 4 . Hahún ba rezultadu ikus nian, atleta timoroan na'in 3 mak hetan títulu direta husi FIDE iha Olimpiade Xadrez Mundial 2022 nian," haktuir Komunikadu ne'ebé Online INDEPENDENTE, asesu kuarta ne’e (10/08).
Entretantu, ho títulu foun tolu mensionadu, Timor - Leste iha ona atleta ho títulu CM na'in ida ( Tito dos Reis ) , WCM na'in rua ( Sonizia Tilman da Silva no Elfiana dos Santos ) no FM na'in ida (Helder Soares de Araújo).
Enkuantu, Timor-Leste nia ekipa feto ultrapasa Nasaun 54 no ekipa mane ultrapasa Nasaun 15 hafoin ronda da-neen iha Olimpiade Xadrez Mundial.
Iha rezultadu impresivu hatudu husi atleta feto no mane Timoroan sira hafoin jogu ronda da-neen iha Olimpiade Xadrez Mundiál ne'ebé realiza hela iha Sidade Chennai - India.
Iha komuniadu haktuir, atleta ekipa feto ne'ebé Kompostu husi atleta Elfiana dos Santos, Maria do Ceu, Sonizia Tilman da Silva no Zulmira Americo Tilman joga di'ak tebes tanba manán Nasaun Mali no Nasaun Cameroon.
Aleinde, atleta balun manán no empata ho Nasaun seluk, lori ekipa Timor-Leste klasifikadu iha pozisaun 108 husi totál nasaun 162 ne'ebé hola parte iha Olimpiade ne'e.
Nune’e mós, ho klasifikasaun naktemin signifika mós ekipa feto Timor-Leste ultrapasa nasaun 54 ne'ebé Jogu Xadrez, la'os modalidade desportiva foun iha sira nia nasaun kompara ho Timor-Leste ne'ebé ninia federasaun foin ho idade Tinan 8 ba 9.
Tanba ne’e, haree ba situasaun kuaze hanesan mós akontese iha ekipa mane Timor-Leste ne'ebé kompostu husi Tito dos Reis, Helder de Araújo, Cosme Guterres no Marcos da Conçeição.
Hafoin jogu ronda da-neen, ekipa mane klasifikadu iha pozisaun 173 husi totál nasaun 188 ne'ebé kompete iha eventu mundiál ne'ebé babain realiza kada tinan 4 ne'e. Ho klasifikasaun ne'e mós hatudu katak, ekipa mane Timor-Leste ultrapasa ona Nasaun 15 seluk mak hola parte mós iha eventu élitu ne'e.
