Ministra Solidariedade Sosial no Inkluzaun, Véronica das Dores hatete, programa bolsa da mãe kondisionál harii tinan barak ona desde iha IV Governu no kontinua to'o agora.
"Tan ne'e IX Governu Konstituisional agora dadaun atu lansa reajustamentu dadus ba bolsa da mãe, ho nia objetivu prinsipal oinsa atu atualiza informasaun kona ba situasaun atual agregadu fámilia ba programa apoiu kondisionál bolsa da mãe," dehan Ministra liu husi konferensia Imprensa ne'ebé hala'o iha Edifisiu MSSI Kaikoli, Segunda (18/09).
Governante afirma, objetivu seluk mak atu reafirma fila-fali sira nia eljibilidade ba programa bolsa da mãe kondisionál no mós atualiza sira nia mudansa hela fatin.
Ministra dehan, programa bolsa da mãe ne’e, implementa bazea ba Dekretu Lei nu.18/2018,4 Abril, ne'ebé artigu 31 define katak durasaun ka permanensia agregadu familia nudar benifisiariu iha programa apoia kondisional bolsa da mãe durante tinan rua.
Entretantu, tuir dadus total funsionariu ne’ebé atu halo reajustamentu ba programa bolsa da mãe kondisional hamutuk 492, kompostu husi funsionariu na’in 107 husi nasional no 385 husi Ssentru Solidariedade Sosial Munisipal inklui RAEOA.
Enkuantu, durasaun implementasaun atividade reajustamenta implementa simultanea, iha teritoriu nasional durante loron 14 iha Fulan-Setembro 2023.
Tan ne'e, Ministra husu ba familia sira atu hakbesik an ba sentru sira ne'ebé estabelese ona iha Aldeia ka Suku iha Postu ida-idak hodi bele téknika sira halo reajustamentu atu nune'e benifisiaria sira nafatin hetan direitu ba bolsa da mae kondisionál.
Enkuantu, total benifisiariu ba programa bolsa da mãe hamutuk 55.185, no orsamentu ne'ebé atu halo halo pagamentu ba benifisiariu sira ho montante hamutuk $5 milhoes.
