Enkuantu, kandidatu refere kompostu husi feto 114 no mane 376, teste refere realiza durante loron haat nia laran, hahú husi loron 19 to'o 22 fulan-Setembro no kada loron sei fó teste ba joven 100.

“Ohin SEFOPE Liu husi DNEE hamutuk ho HDR organiza teste fíziku ba  kandidatu ne'ebé antes ne'e sira liu ona iha exame EPS-Topik iha área fábrika nian,”dehan  Diretór Diresaun Nasionál Empregu Exterior, Filomeno Soares, iha Edifisiu SEFOPE Bekora, (19/09/23).

Nia dehan, teste ne'e organiza direita husi Ministeriu Traballu korea, tan ne'e, sira utiliza tempu durante loron haat antes fila fali ba Korea.

"hahú ohin to’o Sexta-Feria semana ne’e, SEFOPE hamutuk hó reprezentante HRD Korea realiza skill teste ba joven timor-oan 490 ne’ebé pasa ona exame EPS-Topik lian korea área fabrika iha fulan kotuk, no teste ne’e kada loron joven 100," dehan nia.

Diretór afirma, husi teste ne’e karik pasa, mak kandidatu sira sei submete dokumentus ba iha SEFOPE liu husi DNEE hodi rezista ba iha Employment Permit System (EPS) hodi hein kontratu mai husi Ministeriu Traballu Korea Súl.

"Ba kandidatu Atu aproveita hó didi’ak, tanbá atu liu no la-liu bazeia ba ema ida-idak nia esforsu, tanbá fó valor husi reprezentante HRD Korea, ekipa SEFOPE liu-husi DNEE fasilita de’it," dehan Diretor.

Enkuantu, ba kandidatu sira ne'ebé la pasa iha teste refere, Diretór husu atu lalika lakon pesensia katak la hetan ona oportunidade maibé nafatin iha oportunidade.

Iha fatin hanesan, Diretór Indonezia ho Timor-Leste  EPS Center-HRD Korea Park Sehoon hatete, teste ida ne'e nudar teste segundu ba kandidatu sira iha skill báziku tuir mai teste fíziku no intervista, tanba sira hirak ne'e pasa ona teste iha lia Korea.

"Sira nia valór ami foti husi sistema, aleinde valor husi teste lian korea ami mós SEI hare sira nia kapasidade fíziku no data pesoais hanesan altura, todan no vontade ko'alia," dehan nia.

Diretór ne’e akresenta, ba kandidatu ne'ebé pasa ona sei haruka fila-fali ba emprezariu sira iha Korea hafoin rona nia rezultadu.