Orsamentu ne’ebé selu ona ba benifisiariu hirak ne’e mak hamutuk dolar amerikanu $905,560.
Diretór Jeral MSSI Florencio Pina Dias, hatete, Programa Bolsa da Mãe Jerasaun Foun iha Munisipiu tolu hanesan, Ainaro, Bobonaro no Rejiaun Administrativu Espesial Oekuse Ambeno (RAEOA), ba faze dahuluk nian rejistu kontinua la’o.
Nia dehan, iha benifisiariu lubuk ida mak sei iha difikuldade, tanba ne’e MSSI liu husi Diresaun Nasional Administrasaun Finansas nafatin konfirma ho BNCTL atu solusiona problema ida ne’e.
“Hau hanoin ita hotu hatene iha fatin balun, ita iha difikuldade oituan ligadu ho pagamentu tanba kritéria banku nia ne'ebé ita tenki kumpri. Maibé programa bolsa da mãe iha munisipiu Ainaru ho Bobonaro, depois halo komunikasaun ho BNCTL, ita iha ajensia alternativu ida ne'ebé halo servisu hamutuk ho ita, nune’e pagamentu kontinua la'o,” dehan nia ba Online INDEPENDENTE iha knar fatin, Kaikoli, tersa (24/01).
Nia hatutan, tuir dadus, total benifisiariu ba BdM-JF husi Munisipiu Ainaro hamutuk 5.647 ho total orsamentu $138.350, Bobonaro iha na’in 4.391 ho total orsamentu $106,015 no RAEOA iha na’in 27.914 ho total orsamentu $661.195.
Entretantu, to’o iha loron 24 Janeiru 2023, relatoriu hatudu, dadus benifisiariu ne’ebé rejistu ba BdM-JF husi munisipiu tolu, hanesan Ainaro, Bobonaro no RAEOA hamutuk 14.996 aplikantes.
Husi aplikante hirak ne’e, kompostu husi inan isin rua hamutuk 3.117, labarik iha na’in 15.597, inklui labarik ne’ebé identifika hanesan defisiénsia hamutuk na’in 69.
