Komandante Sentru Formasau Polisia (CFP) Arquimino Ramos hatete, guarda Florestal sira bainhira hala'o servisu iha terrenu hetan mós risku ne'ebé amesa ba sira nia vida.

Tanba ne'e, sira tenki iha koñesimentu báziku ruma, oinsa atu defende an iha situasaun perigu ruma.

Atu sai guarda ida ne'ebé profisionál sira mós hetan formasaun konaba karakter sira aprende konaba sidadania, patriotismu no nasionalimu, hodi luta defende an iha situasaun perigu no mós tékniku patrollametu.

“Ita hotu hatene, gurda florestal nia misaun ida mak oinsa atu salva ita nia rikusoin sira iha ai-laran, atu nune'e ai sira ema labele taa no sunu arbiru, tanba bele fó perigu ba ita nia rain,”dehan nia iha CFP, Komoro, segunda ne’e (23/01).

Komandante ne’e hatutan, Governu liu husi guarda florestal sira iha hanoin ida importante tebes atu fó formasaun ba membru sira hodi halo servisu ne'e di'ak liutan.

Iha fatin hanesan, Vise Ministru Agrikultura no Peskas, Abilio Xavier de Aroújo hatete, ema hotu-hotu preokupa kona-ba ai-horis ne'ebé kada loron, fulan tinan sempre lakon, ne'e tanba kauza menus husi guarda florestál sira.

Tanba ne'e, ministériu iha preokupasaun boot ida bainhira aprezenta orsamentu ba Parlamentu Nasionál atu halo rekrutamentu ba joven sira atu halo servisu hanesan guarda florestál nian.

"Iha tinan 2021, ita halo ona rekrutamentu ba membru guarda florestál hamutuk nain-50 no iha tinan 2022 rekruta tan 100, konta hamutuk ho ida rekruta antes hamutuk 200 iha nivél nasionál, maibé ne'e seidauk to'o," dehan Vise MAP.

Nia hatutan tan, aleinde menus kuantidade rekursus guarda florestál, no menus mós fasilidade transporte ne'ebé guarda sira uza hodi kruza ba mai halo monotrizasaun iha fatin terminal sira ne'ebé deskonfia lori ai tama sai, ne'e sira nia enerjia lato'o.

"Ita nia alin sira esforsu kruza ba mai halo monitorizasaun iha terminál sira ho fatin ne'ebé deskonfia komunidade sira lori ai tama sai, maibé sira nia enerjia lato'o, tanba ne'e hau fiar katak governante foun ne'ebé tuir mai iha politika foun preve orsamentu foun hodi bele aumenta tan kuantidade ita nia guarda florestál.

Governante ne’e dehan, tuir polítika MAP nian hakarak kada suku ida tenki iha guarda florestál ida atu nune'e bele mantein seguru ba nia suku rasik atu labele iha ema sunu rai no tesi ai arbiru.

Entretantu, formasaun ne'e sei hala'o durante semana rua nia laran, iha Sentru formasaun Rairobo Postu Administrativu Atabae, Munisipiu Bobonaro.